Mirziyoyev Samarqandda xalqaro turizm markazidagi bunyodkorlik ishlarini ko‘zdan kechirdi

Prezident Shavkat Mirziyoyev 22 mart kuni Samarqanddagi “Buyuk ipak yo‘li” xalqaro turizm markaziga tashrif buyurib, bunyodkorlik ishlari, yaratilayotgan sharoitlar bilan tanishdi.

Qayd qilinishicha, majmuada xorijiy delegatsiyalar va sayyohlarga xizmat ko‘rsatish sifatini oshirish, qulayliklarni kengaytirishga qaratilgan muayyan ishlar olib borilmoqda, qator yangi obektlar qurilmoqda. Jumladan, markaz hududida konsert zali barpo etilmoqda va zamonaviy akustika uskunalari bilan jihozlanmoqda.

Prezident xorijiy delegatsiyalar, ikki tomonlama uchrashuvlar uchun qulayliklarni oshirish bo‘yicha tavsiyalar berdi.

Shu yerning o‘zida Samarqand viloyati hokimi hududning ijtimoiy-iqtisodiy rivojlanishi yuzasidan davlat rahbariga hisobot berdi.

Ta’kidlanishicha, joriy yilda Samarqandda yirik xalqaro anjumanlar bo‘lib o‘tadi. Bugungi kunda “Markaziy Osiyo – Yevropa Ittifoqi” birinchi sammiti va Iqlim forumi, “Markaziy Osiyo – Ko‘rfaz arab davlatlari” sammiti, YuNeSKO Bosh konferensiyasining 43-sessiyasini o‘tkazishga qizg‘in tayyorgarlik ko‘rilmoqda.