Vens: Kiyev uchun eng yaxshi kafolat - AQShning iqtisodiy manfaati

Vashingtonning Ukraina kelajagidan iqtisodiy manfaatdorligi uch yildan ortiq vaqt davomida Rossiya harbiy agressiyasini qaytarayotgan davlat uchun xavfsizlikning eng yaxshi kafolati bo‘ladi. Bu haqda AQSh vitse-prezidenti Jyeyms Devid Vens 3 mart, dushanba kuni Fox News telekanaliga bergan intervyusida ma’lum qildi.

«Agar siz haqiqiy xavfsizlik kafolatlarini xohlasangiz, agar siz haqiqatan ham (Rossiya prezidenti) Vladimir Putin yana Ukrainaga bostirib kirmasligiga ishonch hosil qilishni istasangiz, u holda eng yaxshi xavfsizlik kafolati amerikaliklarga Ukraina kelajagida iqtisodiy ulush berishdir», — dedi Vens. Uning so‘zlariga ko‘ra, bunday xavfsizlik kafolati «30 yoki 40 yildan beri jang qilmagan qandaydir tasodifiy mamlakatdan kelgan 20 000 askardan» ancha yaxshi.

Vens: Zelenskiy Rossiya bilan tinchlikni istamaydi, lekin «majbur bo‘ladi»

Suhbat chog‘ida Jyey Di Vens, shuningdek, Ukraina yetakchisi Volodimir Zelenskiy «oxir-oqibat» Rossiya bilan tinchlik shartlarini muhokama qilishga rozi bo‘lishiga ishonch bildirdi. Oq uydagi so‘nggi janjal haqida gapirar ekan, AQSh vitse-prezidenti Zelenskiy «hurmatsizlik» va AQSh prezidenti Donald Tramp tashabbusi bilan boshlangan «tinchlik jarayonida ishtirok etishni aniq istamasligini» ko‘rsatganini aytdi.

Vensning so‘zlariga ko‘ra, Zelenskiy Rossiya-Ukraina mojarosini hal qilishga «hozir tayyor emas». «Ammo menimcha, u oxir-oqibat u yerga etib boradi. U majbur bo‘ladi», dedi respublikachi.

AFP ta’kidlaganidek, Vens bilan suhbat Tramp Ukraina rahbariyati «tinchlik tarafdori» ekanini ko‘rsatmagunicha, Ukrainaga barcha harbiy yordamni to‘xtatib qo‘yishni buyurganidan oldin yozib olingan.

Vensning qo‘shimcha qilishicha, Zelenskiy va Rossiya prezidenti Vladimir Putinning «muzokaralar stoliga o‘tirishi» «juda muhim». U, shuningdek, Kiyevning Yevropadagi ittifoqchilarini tanqid qilib, ularni vaziyatga «real» nuqtayi nazardan qarashga chaqirdi va urush «abadiy davom eta olmasligini» ta’kidladi.