Вэнс: Киев учун энг яхши кафолат - АҚШнинг иқтисодий манфаати

Вашингтоннинг Украина келажагидан иқтисодий манфаатдорлиги уч йилдан ортиқ вақт давомида Россия ҳарбий агрессиясини қайтараётган давлат учун хавфсизликнинг энг яхши кафолати бўлади. Бу ҳақда АҚШ вице-президенти Жеймс Дэвид Вэнс 3 март, душанба куни Fox News телеканалига берган интервюсида маълум қилди.

«Агар сиз ҳақиқий хавфсизлик кафолатларини хоҳласангиз, агар сиз ҳақиқатан ҳам (Россия президенти) Владимир Путин яна Украинага бостириб кирмаслигига ишонч ҳосил қилишни истасангиз, у ҳолда энг яхши хавфсизлик кафолати америкаликларга Украина келажагида иқтисодий улуш беришдир», — деди Вэнс. Унинг сўзларига кўра, бундай хавфсизлик кафолати «30 ёки 40 йилдан бери жанг қилмаган қандайдир тасодифий мамлакатдан келган 20 000 аскардан» анча яхши.

Вэнс: Зеленский Россия билан тинчликни истамайди, лекин «мажбур бўлади»

Суҳбат чоғида Жей Ди Вэнс, шунингдек, Украина етакчиси Володимир Зеленский «охир-оқибат» Россия билан тинчлик шартларини муҳокама қилишга рози бўлишига ишонч билдирди. Оқ уйдаги сўнгги жанжал ҳақида гапирар экан, АҚШ вице-президенти Зеленский «ҳурматсизлик» ва АҚШ президенти Доналд Трамп ташаббуси билан бошланган «тинчлик жараёнида иштирок этишни аниқ истамаслигини» кўрсатганини айтди.

Вэнснинг сўзларига кўра, Зеленский Россия-Украина можаросини ҳал қилишга «ҳозир тайёр эмас». «Аммо менимча, у охир-оқибат у ерга этиб боради. У мажбур бўлади», деди республикачи.

AFP таъкидлаганидек, Вэнс билан суҳбат Трамп Украина раҳбарияти «тинчлик тарафдори» эканини кўрсатмагунича, Украинага барча ҳарбий ёрдамни тўхтатиб қўйишни буюрганидан олдин ёзиб олинган.

Вэнснинг қўшимча қилишича, Зеленский ва Россия президенти Владимир Путиннинг «музокаралар столига ўтириши» «жуда муҳим». У, шунингдек, Киевнинг Европадаги иттифоқчиларини танқид қилиб, уларни вазиятга «реал» нуқтайи назардан қарашга чақирди ва уруш «абадий давом эта олмаслигини» таъкидлади.