YeK rahbari Yevropani qayta qurollantirish rejasini taqdim etishga va’da berdi

Yevrokomissiya raisi Ursula fon der Lyayyen Yevropa davlatlarini qayta qurollantirishga chaqirdi va yaqin kunlarda bu bo‘yicha tegishli rejani taqdim etishga va’da berdi. Siyosatchi ushbu taklifni Ukraina bo‘yicha Londonda o‘tkazilgan sammitdan keyin ma’lum qildi.

U Yevropa davlatlari yetakchilari bilan o‘tkazilgan muzokaralarni «yaxshi va ochiq munozara», deb atadi. Fon der Lyayyenning so‘zlariga ko‘ra, Ukrainaga o‘z iqtisodiyoti va armiyasini qo‘llab-quvvatlash uchun «keng qamrovli xavfsizlik kafolati» kerak.

«Biz zudlik bilan Yevropani qayta qurollantirishimiz lozim. Uzoq davrdan beri yetarlicha investitsiya kiritilmaganidan keyin endi uzoq muddatga mudofaa uchun sarmoyani oshirish juda muhim. Yevropa Ittifoqi xavfsizligi uchun bu kerak. Hozir yashayotgan geostrategik muhitimizda biz eng yomoniga tayyor bo‘lishimiz va shuning uchun mudofaani kuchaytirishimiz kerak».

Ursula fon der Lyayyen mudofaa xarajatlarini oshirish uchun soliq siyosati ham o‘zgarishi mumkinligi haqida gapirdi. «YeI davlatlar mudofaa xarajatlarini keskin oshirish uchun kengroq fiksal maydonga muhtoj», — deydi u. Yevrokomissiya raisining so‘zlariga ko‘ra, 6 mart kuni Bryusselda o‘tkaziladigan YeI sammitida bu boradagi tegishli reja taqdim etiladi.

Shuningdek, fon der Lyayyen AQSh bilan dialog borasidagi savolga ham javob qaytardi: «Biz birgalikda demokratiya va hujum qilish, qo‘shningni qo‘rqitish va chegarani kuch bilan o‘zgartirish mumkin bo‘lmagan qonun ustuvorligi prinsiplarini himoya qilishga tayyormiz».