Shri-Lankada fillarni urib yuborgan poyezd relsdan chiqib ketdi

Adaderana portalining yozishicha, voqea 19 fevral kuni Gal Oyya hududida yuz bergan. Battikaloadan Kolomboga ketayotgan «Minagaya» poyezdi temiryo‘lni kesib o‘tayotgan fillarni urib yuborgan. Oqibatida oltita fil nobud bo‘lgan.

Bundan tashqari, hodisa temiryo‘l transporti harakat jadvaliga ham o‘zgartirish kiritilishiga olib kelgan. Battikaloadan Kolomboga qatnovchi «Pulatisi» reysi bekor qilingan. Temiryo‘l departamenti «Minagaya» yo‘lovchilari uchun boshqa poyezdni tashkillashtirib bergan.

Qayd etilishicha, qo‘riqxona hududlaridan o‘tgan temiryo‘llarda bu kabi muammolar kuzatilib turadi. Mahalliy hukumat va ekologlar kelajakda bunday hodisalar ro‘y bermasligi uchun xavfsizlik choralarini kuchaytirishga chaqirmoqda.

Fillar bilan bog‘liq holat yuzasidan tergov o‘tkazilmoqda, mutaxassislar temiryo‘l atrofiga qo‘shimcha to‘siqlar va ogohlantiruvchi tizimlarni o‘rnatish imkoniyatini ko‘rib chiqmoqda.

Noyabr oyida Hindistonda uch kun ichida 10 ta fil nobud bo‘lgani to‘g‘risida xabar berilgandi. O‘shanda fillar hosillari nobud bo‘layotgan norozi fermerlar tomonidan zaharlangan bo‘lishi mumkinligi haqida tasdiqlanmagan xabarlar tarqalgan edi. Ammo hukumat amaldorlarining aytishicha, qasddan zaharlashning hech qanday alomatlari aniqlanmagan.