Abdurahmon Tashanov o‘ziga bosimlar boshlanganini ma’lum qildi

«Ezgulik» inson huquqlari jamiyati rahbari Abdurahmon Tashanov so‘nggi vaqtlarda o‘ziga nisbatan turli bosimlar oshib borayotganini ma’lum qildi.

Xususan, 26 yanvar kuni Hindistonga uchayotganida, Toshkent xalqaro aeroportida uning pasportini olib qo‘yib, 1 soatdan ortiq ushlab turishgan hamda haqoratomuz munosabatda bo‘lishgan.

«Dehliga juda yomon kayfiyatda uchyapman. Aeroportda narsalarimni titib tashlashdi, pasportimni olib qo‘yib, bir soatdan ortiq ushlab o‘tirishdi. Yechintirib, chotimgacha tekshirishdi. O‘ta haqoratomuz munosabatda bo‘lishdi. Kimga shikoyat qilaman, hatto bilmayman.

Aeroport xodimlarining yuz-ko‘zida xijolatchilik sezdim. «Aka, xizmatchilik, sizni taniymiz» deyishdi. Bunaqangi haqoratomuz munosabatdan so‘ng ortga qaytmoqchi bo‘ldim, sherigim shashtimdan qaytardi. Sharafsizlar.

Huquq himoyachisi bo‘la turib, o‘zgalar huquqini himoya qilib, sharafsizlar oldida ojiz qoldim. Sog‘lig‘imga putur yetdi, o‘tgan hafta shifoxonadan chiqqandim. Ming la’nat!» — deb yozgan huquq faoli.

Abdurahmon Tashanov 24 yanvar kuni o‘zining Facebook’dagi sahifasiga muqobil ravishda kirish holati aniqlangani haqida yozgan edi.

Shuningdek, Tashanov 22 yanvar kuni o‘zi haqida kompromat yig‘ishga urinayotganlar borligi hamda bu borada bir necha xatlar olganini yozgan edi.

«G‘amxo‘rlarimizning biz haqimizda kompromat yig‘ishga urinayotgani haqida xabarlar kelmoqda. Kecha bu borada bir necha xatlar oldim. Nazarimda, nimadir qilishmoqchi, qandini ursin. Bu soyalar va qoyalar kurashi, qurbon bo‘lsak, achinmayman», – degan Tashanov o‘z postida.

Abdurahmon Tashanov O‘zbekistondagi mustaqil «Ezgulik» inson huquqlari jamiyatining rahbari hisoblanadi. U muntazam ravishda jamiyatdagi turli siyosiy-ijtimoiy mavzularda mahalliy va xorijiy OAVda chiqishlar qilib boradi. Shuningdek, u rahbarligidagi tashkilot sud va tergov jarayonlarida fuqarolarning murojaatlari asosida qatnashib keladi.

2024 yil 10 dekabr kuni Parij shahrida «Ezgulik» inson huquqlari jamiyatiga Fransiya adliya vaziri Didiye Migo Inson huquqlari bo‘yicha «Ozodlik, tenglik, birodarlik» mukofotini topshirgan edi.