Germaniyalik yigit operatsiyalar yordamida oyoqlarini 24 santimetrga uzaytirdi

Germaniyada bo‘yi pastligi sabab tushkunlikda yurgan Leon Otremba operatsiya orqali oyoqlarini uzaytirishga qaror qildi. Ikki yil ichida uning bo‘yi 24 santimetrga o‘sdi, ammo endi uning hayoti kuchli og‘riqlar bilan davom etmoqda, deb yozadi Metropoles.

Qayd etilishicha, 23 yoshli Otremba bo‘yi 171 santimetr bo‘lganidan juda uyalgan, u o‘zini pakana deb hisoblab kelgan. Shu bois u ikki yil davomida oyoqlarini uzaytirish bo‘yicha ikkita operatsiyani boshdan o‘tkazgan va hozirda uning bo‘yi 195 santimetrni tashkil etadi.

Birinchi operatsiya 2023 yilda amalga oshirilgan. O‘shanda metall sterjenlar va tashqi fiksator yordamida Leonning son suyaklari 10 santimetrga uzaytirilgan. Suyaklarni sekin-asta cho‘zish uchun konstruksiya har kuni 1 millimetrga tortilgan. U operatsiya joyi yallig‘lanmasligi uchun muntazam tekshiruvdan o‘tib turgan.

Ikkinchi operatsiya 2025 yil boshlarida o‘tkazilgan. Bu safar uning boldir suyaklari klik-tizimli ichki mexanizm yordamida uzaytirilgan. Leonning ta’kidlashicha og‘riq u qadar kuchli bo‘lmagan, ammo operatsiyadan keyin o‘zini tiklab olishi uchun oylar kerak bo‘lgan. Yigit hatto yurishni qaytadan o‘rgangan.

O‘z navbatida ortopedlarning ogohlantirishicha, bu kabi operatsiyalar inson sog‘lig‘iga katta xavf tug‘diradi. Luchano Miller ismli shifokorga ko‘ra, oyoqlarni uzaytirish faqat tibbiy ko‘rsatkichlar, masalan, tug‘ma kasalliklar holatida amalga oshirilishi lozim. Uning ta’kidlashicha, shifokorlar aralashuvi mushaklarga ta’sir ko‘rsatadi va tana biomexanikasini buzadi.