Turkiyada vizasiz qancha muddat bo‘lish mumkin: 30 kunmi yoki 90?  

Savol qayerdan kelib chiqdi?

6 mart kuni “Uzbekistan Airports”ning Telegram’dagi rasmiy kanalida O‘zbekiston fuqarolarining qator davlatlarga borishi uchun viza talablari qanday ekani hamda qaysi mamlakatlarga vizasiz borish mumkinligi haqidagi ma’lumot e’lon qilingan. Unda Turkiyada vizasiz qolish muddati 30 kungacha deb ko‘rsatiladi.

Holat bo‘yicha Kun.uz’ga murojaat qilgan fuqaro “Uzbekistan Airports” AJ matbuot kotibi Yevgeniya Grande bilan ham suhbatlashgan. Grandening qayd etishicha, aviakompaniya rasmiy manba sifatida Tashqi ishlar vazirligining rasmiy saytidagi ma’lumotdan foydalangan.

Hozirda TIVning rasmiy saytidagi bu xabarda Turkiyaga sayyohlik maqsadida tashrif buyuruvchi O‘zbekiston fuqarolari uchun viza olish tartibi 90 kungacha ekani qayd etilgan. Ammo Yevgeniya Grandening so‘zlariga ishonadigan bo‘lsak, bu ma’lumot TIV saytida dastlab 30 kun qilib ko‘rsatilgan. Buni quyidagi o‘sha saytdan olingan skrinshot ham tasdiqlaydi.

TIV saytiga kirib, aynan shu xabar bo‘yicha qidiruv berilsa, so‘nggi ma’lumot 2019 yilda qo‘yilgani ko‘rinadi. Unda Turkiyada vizasiz qolish muddati 90 kungacha ekani ham aks etgan.

Aslida tartib qanday? 

Turkiya prezidenti 2018 yil 10 noyabrda imzolagan 327-sonli qaror bilan O‘zbekiston, Qozog‘iston va Tojikiston fuqarolari uchun Turkiyada vizasiz qolish muddati 30 kundan 90 kungacha uzaytirilgan.

Bu qarorgacha o‘zbekistonlik fuqarolar faqat diplomatik pasportga ega bo‘lsagina Turkiyada 90 kungacha vizasiz qolishlari mumkin bo‘lgan.

Shuningdek, yangi tartibning hanuz amalda ekanini Turkiya Ichki ishlar vazirligi Migratsiya boshqarmasining rasmiy saytidagi axborot ham tasdiqlaydi.