O‘zbekiston xalqi bizni yolg‘izlatib qo‘ymadi – Turkiya elchisi Olgan Bekar 

Turkiya Respublikasining Toshkentdagi elchixonasi do‘stlik, birodarlik, yordam va ko‘mak ko‘rsatib kelayotgan O‘zbekistonga ramziy ma’noda minnatdorlik bildirish maqsadida «Tashakkur qabul marosimi»ni tashkil etdi. 

Tadbirda Turkiyaning O‘zbekistondagi Favqulodda va muxtor elchisi Olgan Bekar nutq so‘zladi. 

«Ro‘y bergan zilzilalar oqibatida Turkiya «Asr falokatini» boshidan o‘tkazdi. Bugungi kungacha 7 nafar o‘zbek qardoshimiz bilan jami 47 475 kishini ushbu mash’um falokatda yo‘qotdik», dedi elchi. 

Bekar so‘zlariga ko‘ra, O‘zbekiston davlati va xalqi bu mash’um falokatdan so‘ng olijanobligini namoyish etib, Turkiyani yolg‘izlatib qo‘ymadi. 

«Zilzila xabari kelib tushgan ilk lahzalardanoq elchixonamiz muvofiqlashtiruvida Toshkentda 3 ta manzilda zarur buyumlar yig‘ildi. 8 fevral kuni 71 kishilik tibbiyot xodimi Turkiyaning Hatoy viloyatida dala gospitali o‘rnatib, jarohat olganlarni davolashga kirishdi. Dala gospitalida 1 795 nafar erkak, 1 177 ayol va 888 nafar bolaga, jami 3 860 nafar Turkiya fuqarosiga tibbiy yordam ko‘rsatildi. Shu bilan birga yurtdoshlarimiz zilzila hududlariga borib, o‘zbek palovini pishirib, ehtiyojmandlarga tarqatdi», dedi elchi. 

Bekar so‘zlariga ko‘ra, «O‘zbekiston havo yo‘llari», «Turk havo yo‘llari», MNG Kargo va yuk transportlari orqali bugungacha Turkiyaga 674 tonna gumanitar yordam yetkazib berilgan. 

«Bugungi kungacha 644 ming AQSh dollari miqdorida naqd mablag‘ mamlakatimizga yuborildi. Mablag‘lar hamon kelishda davom etmoqda. Bizdan yordamini ayamagan mutasaddilarga minnatdorlik izhor etishni o‘zimning burchim deb bilaman», dedi elchi.