“Paxtakor” stadionida muxbirlar do‘pposlangani bo‘yicha jinoyat ishi ochildi. IIV o‘z xodimlarini mutlaqo aybsiz deb aytgandi

11 iyun kuni Toshkentdagi “Paxtakor” stadionida futbol bo‘yicha U-23 Osiyo kubogining chorak finali doirasida O‘zbekiston–Iroq o‘yinini yoritishga borgan "Sevimli" telekanali muxbiri va tasvirchisi hamda huquqni muhofaza qiluvchi organ xodimlari o‘rtasida kelishmovchilik kelib chiqqan edi.

Bosh prokuratura axborotiga ko‘ra, holat yuzasidan Shayxontohur tumani prokuraturasi tomonidan Jinoyat kodeksining 206-moddasi (Hokimiyat yoki mansab vakolati doirasidan chetga chiqish) bilan jinoyat ishi qo‘zg‘atilib, dastlabki tergov harakatlari boshlangan.

“Tergovning borishi ustidan Bosh prokuratura tomonidan alohida nazorat o‘rnatildi”, deyiladi xabarda.

Xabarda jinoyat ishiga gumonlanuvchi sifatida necha kishi jalb etilgani aytilmagan.

Kun.uz voqea tafsilotlarini har ikki tomonning nuqtayi nazari asosida yoritgan edi. Eslatib o‘tamiz, jabrlanuvchi tomon – jurnalist va tasvirchi ularni 6-7 nafar ichki ishlar xodimi va 1 nafar milliy gvardiya zobiti kaltaklaganini iddao qilgandi.

Voqeada jabrlangan tasvirchiga jag‘-tish sinishi tashxisi qo‘yilgandi. Ularning texnikalariga ham shikast yetkazilgan.

Ichki ishlar vazirining matbuot kotibi Shohrux G‘iyosovning versiyasiga ko‘ra, “Sevimli TV”ning ikki xodimini organ xodimlari do‘pposlamagan – ular stadionda bo‘sh joy qolmaganiga qaramay, ichkariga kirish uchun janjal uyushtirgan muxlislar o‘rtasidagi mushtlashuv vaqtida jarohatlangan.

G‘iyosov u yerda kim bilan kim mushtlashganiga oydinlik kiritmasdan, telekanal operatori shu mushtlashuv vaqtida jarohatlanganini iddao qilgandi.

IIV mulozimi holat yuzasidan tekshiruv tayinlagani haqida xabar berganiga bir oydan oshdi, tekshiruv natijalari haqida ma’lumot e’lon qilinmadi.

• Ma’lumot o‘rnida, voqea yuzasidan AOKA, Mass-media fondi va Jurnalistlar uyushmasi bayonot berib, huquq organlaridan voqea yuzasidan xolis tekshiruv o‘tkazish va aybdorlarni jazolashni talab qilgandi.