Toshkentda Xalqaro animatsiya forumi o‘tkaziladi

Joriy yilning 18-22 aprel kunlari Toshkentda Tashkent International Animation Forum (TIAF-22) bo‘lib o‘tadi. Animatsion forum Kinematografiya agentligi tashabbusi bilan Shveytsariya va Isroilning O‘zbekistondagi elchixonalari, Toshkentdagi Gyote instituti, Bazelevs kinokompaniyasi, Milliy kinematografiyani rivojlantirish markazi, O‘zbekiston Milliy kinofondi hamda "DRF" community independent filmmakers of Uzbekistan” kinostudiyasi hamkorligida tashkil etiladi. Forumda Germaniya, Gruziya, Isroil, Ozarboyjon, Tojikiston, Rossiya, Ukraina va Chexiya davlatlaridan animatsiya mutaxassislari, shu bilan bir qatorda o‘zbek animatorlari va “Aqlvoy”, “Bolajon” telekanallaridan vakillar ishtirok etadi.

Animatsion forum O‘zbekiston Respublikasi Prezidentining 2022 yil 28 yanvardagi PF–60-son Farmoni bilan tasdiqlangan 2022-2026 yillarga mo‘ljallangan Yangi O‘zbekistonning taraqqiyot strategiyasini “Inson qadrini ulug‘lash va faol mahalla yili”da amalga oshirishga oid Davlat dasturida belgilangan vazifalar ijrosini ta’minlash maqsadida tashkil etilmoqda.

Ushbu Farmonda “O‘zbekmultfilm” studiyasini tashkil qilish, faoliyatini jahon tajribasi asosida yo‘lga qo‘yish, mahalliy va xorijiy mutaxassislarni jalb qilish, shuningdek xorijiy animatsiya studiyalari bilan muzokaralar olib borish, mahalliy mutaxassislarni tayyorlash bo‘yicha tajriba almashish, o‘quv kurslari tashkil qilish belgilangan, – deya ta’kidladi Kinematografiya agentligi rahbari Firdavs Abduxoliqov.

Forum doirasida mohir animatorlar tomonidan taqdimotlar, mahorat darslari, master-klaslar, ijodiy uchrashuvlar va shu kabi qator tadbirlar o‘tkaziladi. Jumladan, 10 ga yaqin davlatdan tashrif buyurgan animatsiya sohasida faoliyat yuritayotgan mutaxassislar tomonidan seminar-treninglar bo‘lib o‘tadi.

Forumning e’tiborli jihati, unda chet eldan etalon negativlari qaytarilgan o‘zbek multfilmlari ilk bor keng jamoatchilikka namoyish etiladi. Shuningdek, “Yoshlik” studiyasining “Zumrasha” hajviy jurnali yangi soni taqdimoti hamda xorij animatorlari tomonidan yaratilgan eng yaxshi multfilmlar kichik tomoshabinlar e’tiboriga taqdim qilinadi. Ushbu forum doirasida viloyatlar bo‘ylab ham tadbirlar tashkil etiladi. Bolajonlar uchun turli xil mavzularda multfilmlar namoyish etilishi bilan birga, master-klasslar o‘tkaziladi.

Bundan tashqari, bolalarga pedagoglar va professional animatorlar bilan muloqot qilish va tajriba almashish imkoniyati taqdim qilinadi. Ular uchun “Astir animation studio”, “Futurist studio”, “Dip animation studio” hamda xorij animatsiya studiyalarining ishlari namoyish etiladi. Yana shuningdek, forum doirasida o‘smirlar uchun yosh ijodkorlar tomonidan yaratilgan filmlar taqdimoti o‘tkaziladi.

Ushbu havola orqali forumda ro‘yxatdan o‘tish mumkin: http://tiaf.uz/ru/registration

Milliy kinematografiyani rivojlantirish markazi matbuot xizmati Ⓣ