Ozarboyjon Armaniston bilan chegaradagi keskinlik ortida harbiy mashg‘ulotlar boshladi

Ozarboyjonda Armaniston bilan chegaradagi keskinlik ortida harbiy mashg‘ulotlar boshlandi. Mashg‘ulotlarda 15 ming harbiydan tashqari, 300ta zirhli texnika, 400ga yaqin raketa-artilleriya qurilmasi, yalpi o‘t ochish reaktiv tizimlari, minomyotlar va tanklarga qarshi vositalar, 50taga yaqin samolyot, vertolyot va dronlar ishtirok etadi.

Xabarda ta'kidlanishicha, mashg‘ulotlarda asosiy e'tibor Bokuda Armaniston bilan Tog‘li Qorabog‘da 2020 yil kuzida yuz bergan ixtilofda to‘plangan jangovar tajriba hisobga olinib, qo‘shinlarni boshqarish, ularni jangovar shaylik holatiga keltirish va qayta guruhlashga qaratiladi.

Ozarboyjon mashg‘ulotlar o‘tkazishini 12 mayda e'lon qilgan. Shu kuni Armaniston ozarboyjonlik harbiylar «chegarani aniqlashtirib olish» vaji ostida Armaniston chegaraoldi hududlaridan birida muayyan ishlarni amalga oshirishga uringanini ma'lum qilgan. Ushbu ishlar arman harbiylari aralashuvidan keyin to‘xtatilgan. Yerevanning ta'kidlashicha, 13 may kuni Ozarboyjon harbiylari Vardenis (Gegargunik oblasti) va Sisian (Syunik oblasti) shaharlari yaqinidagi chegara orqali Armanistonga kirishga uringan.

Armaniston bosh vaziri vazifasini bajarayotgan Nikol Pashinyan ushbu hodisalarni mamlakat suverenitetiga rahna solish deb atagan. Uning aytishicha, ozarboyjonlik harbiylar Armaniston hududiga 3,5 km ichkari kirib, Sevlich ko‘lini o‘rab olmoqchi bo‘lgan. Pashinyan Bokuni nizo chiqarishga urinishda ayblab, 14 may kuni Rossiyadan harbiy yordam so‘ragan.

O‘z navbatida, Ozarboyjon Yerevanning munosabatini noo‘rin deb atab, Tog‘li Qorabog‘da o‘t ochishni to‘xtatish bo‘yicha 2020 yil noyabrda tuzilgan bayonotga ko‘ra, Armaniston bilan chegaradosh Kelbajar va Lochin tumanlarida chegara qo‘shinlarini joylashtirish jarayoni borayotganini ma'lum qilgan.