Xivada ikki yilda 20tadan 5-7 qavatli uylar quriladi

Vazirlar Mahkamasining “2021-2022 yillarda Xiva shahrini kompleks rivojlantirish dasturi to‘g‘risida”gi qarori loyihasi e'lon qilindi.

Iqtisodiy taraqqiyot va kambag‘allikni qisqartirish vazirligi, Investitsiyalar va tashqi savdo vazirligi, Moliya vazirligi, Turizmni rivojlantirish davlat qo‘mitasi, Savdo-sanoat palatasi, “Mikrokreditbank” ATB, Xiva shahar hokimligi hamda boshqa manfaatdor vazirliklar, idoralar, xo‘jalik boshqaruvi organlari va tijorat banklari tomonidan ishlab chiqilgan 2021-2022 yillarda Xiva shahrini kompleks rivojlantirish dasturi tasdiqlanadi.

Qurilish vazirligi, Davlat soliq qo‘mitasi huzuridagi Kadastr agentligi Xorazm viloyati hokimligi bilan birgalikda:

• Xiva shahrida 2021-2022 yillarda har yili 20tadan 5-7 qavatli uylar qurilishini tashkil etish;
• “Ichan-qal'a” va “Deshon-qal'a” majmualari o‘rta qismida joylashgan, biroq ular me'moriy qiyofasiga mos kelmaydigan turar va noturar joy binolarini shahar boshqa qismiga ko‘chirish, shu munosabat bilan fuqarolar hamda yuridik shaxslarga yetkazilgan zarar o‘rnini Vazirlar Mahkamasining 2019 yil 16 noyabrdagi 911-sonli qarorida ko‘rsatilgan tartibda qoplash choralarini ko‘radi.

Xiva shahar hokimligi o‘z ma'muriy binosiga ega emasligi sababli hozirda Xiva shahar, Najmiddin Kubro ko‘chasi, 27-uyda joylashgan Xalq demokratik partiyasi Xiva shahar kengashi binosidan ijara asosida foydalanayotganini inobatga olib:

• Adliya vazirligi balansida bo‘lgan, hozirda foydalanilmayotgan eski notarius binosini belgilangan tartibda Xalq demokratik partiyasi Xiva shahar kengashi balansiga;
• Xalq demokratik partiyasi Xiva shahar kengashi balansida bo‘lgan binoni Xiva shahar hokimligi balansiga;
• Xiva shahar hokimligi balansida bo‘lgan, yangi qurib ishga tushirilgan davlat xizmatlari markazi binosini Adliya vazirligi balansiga beg‘araz o‘tkazib berish bo‘yicha Xalq demokratik partiyasi markaziy kengashi, Adliya vazirligi, Xorazm viloyati hokimligining takliflari ma'qullanadi.

Madaniyat vazirligi, Qurilish vazirligi Xorazm viloyati hokimligi bilan birgalikda “Ichan-qal'a” davlat muzeyi qo‘riqxonasi qoshida “Madaniy meros obektlarini restavratsiya qilish, tiklash va ta'mirlash” DUK faoliyatini tashkil etib, yuqori malakali hamda tajribaga ega bo‘lgan mahalliy va xorijiy usta-restavratorlarni jalb qilish choralarini ko‘radi.