Ravshan Ermatov 10 ming qadam yurganlik uchun 3 ming so‘m to‘lanishi haqida gapirdi

«Bizning ko‘rsatkichlarimizni oladigan bo‘lsak, Yevropa va sog‘lom turmush tarzini avvalroq yo‘lga qo‘ygan davlatlardan ancha orqada ekanimiz ko‘zga tashlandi. Shuning uchun ham yurish, yugurish, stritbol, badminton, mini futbol, voleybol, basketbol kabi o‘yinlar orqali biz aholini sportga jalb qilmoqchimiz.

Albatta, boshlanishida ularni sportga qiziqtirib, uylaridan, ishxonalaridan chiqarib sport tadbirlarini tashkil qiladigan bo‘lsak, 1–2 oydan keyin avtomatik ravishda sog‘lom turmush tarzi ularning har kun e’tibor qiladigan ishlariga aylanib qoladi.

O‘zimizdan misol keltiradigan bo‘lsam, 2–3 kun sport bilan shug‘ullanmasak, nimadir yetishmayotgandek tuyuladi. Aholimiz ham shunday holatda bo‘lsa, o‘ylaymanki, har qanday kasallikning oldini sport orqali olish, sport orqali yengish mumkin bo‘ladi», – dedi vazir o‘rinbosari.

Ravshan Ermatov kuniga 10 ming qadam yurgan fuqaro moddiy rag‘batlantirilishi g‘oyasiga munosabat bildirdi.

«10 ming qadam yurgan shaxsning hisob raqamiga 3 ming so‘m o‘tkazilishi bir stimuldek ko‘rinsa-da, lekin mening ishonchim komilki, buncha qadamlarni bizning aholimiz pul uchun emas, o‘z sog‘lig‘ini tiklash uchun, qandaydir kasalliklarga uchramaslik uchun tashlaydi.

To‘g‘risini aytganda, biz xalqaro tajribada bunday yondashuvni ko‘rmaganmiz, bu – o‘zbek modeli va o‘zbekistonliklar o‘z modelini targ‘ibot qilyapti.

Yaqinda o‘qidik, bu yangilik Buyuk Britaniyaning The Guardian nashrida ham chop etildi. O‘ylaymanki, sog‘lom turmush tarzi va sportga bunday yondashish juda katta natijalarni yaqin orada beradi», – dedi Ravshan Ermatov.

• Oktabr oyida imzolangan prezident farmoniga binoan, bir sutkada 10 ming qadam yurgan fuqarolarga 3 ming so‘m to‘lanadigan mexanizm joriy etiladi. Buning uchun «Sog‘lom turmush tarzi» nomli platforma 2021 yil 1 martga qadar ishlab chiqiladi.
• Har oyda har bir tuman (shahar) bo‘yicha eng ko‘p yurgan shaxsga 300 ming so‘mdan, har bir hudud bo‘yicha eng ko‘p yurgan shaxsga 500 ming so‘m, respublika bo‘yicha eng ko‘p yurgan shaxsga 1 mln so‘m qo‘shimcha ravishda platformadagi elektron hamyoniga o‘tkaziladi.