«Madaniyat va ma'rifat» telekanalida 4ta islomiy ko‘rsatuv efirga uzatiladi

Foto: Uzbekistan Today

Kuni kecha «Madaniyat va ma'rifat» telekanalida O‘zbekiston musulmonlari idorasi bilan hamkorlikda to‘rtta yangi islomiy ko‘rsatuv efirga uzatilishi vaqtlari tasdiqlandi. Bu haqda Islom.uz portali xabar bergan.

Aniqlanishicha, 20-mart kuni «So‘ragan edingiz» ko‘rsatuvi mazkur telekanal orqali efirga uzatiladi. Boshlanish vaqti esa seshanba, soat 18-00 etib belgilangan. Xabarda aytilishicha, ko‘rsatuv haftaning har seshanba kunlari muntazam davom etib boradi. Teletomoshabinlar uchun kechki va ertasi kunduzgi dasturlarda takroran namoyish etilishi rejalashtirilgan.

Shuningdek, «Qur'onni o‘rganamiz» ko‘rsatuvi chorshanba kuni, soat 18-00 «Madaniyat va ma'rifat» telekanalida efirga uzatiladi. Ushbu ko‘rsatuv ham chorshanba kunlari doimiy ravishda davom etishi nazarda tutilgan.

Bundan tashqari, «Oltin silsila» ko‘rsatuvining ilk soni, 22-mart, payshanba kuni, soat 18-00 efirga qo‘yiladi. «Bitiklar mutolaasi» ko‘rsatuvi esa 24-mart, shanba kuni, soat 18-00 teletomoshabinlarga havola etiladi.

#islom #Madaniyat va Ma’rifat telekanali