АҚШ нодавлат ташкилоти ҲАМАСни ўз ходимларини ўлдиришда айблади

Ғазо гуманитар жамғармасининг маълум қилишича, ҲАМАС жангчилари унинг камида беш нафар фаластинлик ходимини ўлдирган.

Фото: AP

АҚШда жойлашган Ғазо Гуманитар жамғармаси (GHF) 11 июн, чоршанба куни кечқурун Хон-Юнус ҳудудида ишга кетаётган автобусга қуролли ҳужум оқибатида камида беш ходими ҳалок бўлгани ва бир неча киши яраланганини маълум қилди. AFP хабарига кўра, ҳалок бўлганларнинг барчаси фаластинликлардир.

GHF ҳужумда АҚШ ва Европа Иттифоқи томонидан террорчи гуруҳ сифатида тан олинган Фаластиннинг ҲАМАС гуруҳини айблади. GHF баёнотида шундай дейилади: «Ғазо вақти билан тахминан соат 22:00 да GHF гуруҳининг йигирмадан ортиқ аъзоси бўлган автобусга ҲАМАС томонидан шафқатсизларча ҳужум қилинди. Биз ҳали ҳам фактларни текширмоқдамиз, аммо биз билган нарса даҳшатли: камида беш киши ҳалок бўлди, кўпчилик яраланди ва жамоамиз аъзоларидан баъзилари гаровга олинган бўлиши мумкин».

Ғазо сектори аҳолисига гуманитар ёрдам етказиб бериш ва тарқатиш билан шуғулланувчи GHF халқаро гуманитар ташкилотлар билан мувофиқлашмасдан минтақада ўз фаолиятини бошлагани БМТ ва бошқа ташкилотларнинг танқидига учради. Newsru.co.il'нинг ёзишича, ҲАМАС Ғазо секторида гуманитар ёрдам тарқатишнинг ушбу тизими доирасида Исроил ва АҚШ билан ҳамкорлик қилишга уринаётганларни «хоин» деб эълон қилган.

#АҚШ #Ғазо #ҲАМАС