Путиннинг маслаҳатчиси: АҚШ билан мулоқот давом этади

Москва ва Вашингтон ўртасидаги «конструктив мулоқот» «бузғунчи босим тили»дан кўра фойдалироқ бўлади, деди РФПИ раҳбари Дмитриев. У АҚШ собиқ президенти Байденни ҳам танқид қилди.

Кирилл Дмитриев Фото: Максим Константинов / ТАСС

Россия ва АҚШ ўртасидаги «конструктив мулоқот» давом этади, чунки бу «босимга қарши уринишлардан кўра самаралироқ». Бу ҳақда ўзининг Telegramʼдаги каналида Россия тўғридан тўғри инвестициялар жамғармаси (РФПИ) раҳбари, Россия президентининг хорижий давлатлар билан сармоявий ва иқтисодий ҳамкорлик бўйича махсус вакили Кирилл Дмитриев ёзган.

Дмитриевнинг сўзларига кўра, ҳозирда Москва ва Вашингтон ўртасидаги мулоқотни «барча мумкин бўлган усуллар билан» бузиш учун «титаник ҳаракатлар» қилинмоқда. Владимир Путиннинг махсус вакили бу ҳаракатларни айнан ким амалга ошираётганига аниқлик киритмади.

У, шунингдек, АҚШнинг аввалги президенти Жо Байденни «нотўғрилигини исботлаган хато ёндашувлари» учун танқид қилди. «Тенг ҳуқуқли мулоқот, ўзаро ҳурмат, реализм ва иқтисодий ҳамкорлик глобал хавфсизлик ва барқарор тинчликнинг асосидир», — дея якунланади Дмитриев пости.

10 июл куни АҚШнинг амалдаги президенти Доналд Трамп Американинг NBC телеканалига берган интервюсида Россиядан «ҳафсаласи пир бўлганини» ва бу борада «муҳим баёнот» бермоқчи эканини айтди. Axios нашри Трамп Киевга нафақат Patriot зенит-ракета комплексларини, балки Москвагача етиб борадиган узоқ масофаларга учадиган ракеталарни етказиб беришини эълон қилишини кутганди. Европа иттифоқчилари бу таъминот учун пул тўлаши лозим.

#АҚШ #Россия #Кирилл Дмитриев