Индонезия ишга қабул қилишда ёш чекловларини олиб ташлади

Мамлакат меҳнат бозорини кекса ва тажрибасиз ёш мутахассисларга очиб бермоқда.

Фото: AP

Индонезия ҳукумати ишга қабул қилиш учун ёш чегараларини белгилашни расман тақиқлади.

Янги қонун фуқароларнинг ёшидан қатъий назар тенг ҳуқуқларини таъминлаш, меҳнат бозорида камситиш ҳолатларига барҳам бериш мақсадида кучга киради. Бу ҳақда SCMP хабар берди.

Илгари компаниялар кўпинча 45 ёшдан ошган талабгорларни рад этар ёки аксинча, маълум бир оптимал ёшга етмаган ёшларни ишга олмас эди. Энди бу қонун бузилиши сифатида баҳоланади. Иш берувчилар ёшга доир камситувчи вакансияларни эълон қилса, жаримага тортилади.

Бу қадам аҳолининг иқтисодиётдаги фаоллигини ошириш, ижтимоий ҳимояга муҳтож қатламлар орасида ишсизликни камайтиришга қаратилган.

Индонезия ҳукуматининг фикрича, умр кўриш давомийлиги ошгани ҳисобга олинса, ёшга оид тўсиқ энди инсоннинг ҳақиқий меҳнат қобилиятини акс эттирмайди.

Касаба уюшмалари бу ҳаракатни адолатли ишга қабул қилиш сари қадам сифатида олқишлади, лекин айни пайтда ҳукумат қарорига риоя этилишини таъминлаш учун қоидалар талаб қилмоқда.

Бироқ, иш берувчи компаниялар энди иш изловчиларнинг катта оқимига дуч келиши мумкинлигидан огоҳлантирмоқда. Ҳозир Индонезияда 7 миллиондан ортиқ ишсиз бор ва ёши катта иш изловчилар кўпинча қайта ишга жойлашиш учун тўсиқларга дуч келади.

#Индонезия #касаба уюшмаси #меҳнат ҳуқуқи