Хитой Ўзбекистонда сув ресурсини тежаш лойиҳаларига жалб этилади

Тадбирда провинциянинг масъул иқтисодий тузилмалари, бизнес уюшмалари ва етакчи маҳаллий компаниялар вакиллари иштирок этди. Йиғилганлар учун Ўзбекистоннинг инвестициявий имкониятлари, савдо-иқтисодий ва туризм салоҳиятига бағишланган тақдимот ўтказилди.

Унда мамлакатда хорижий сармоядорлар учун яратилган қулай шароитлар, солиқ ва божхона имтиёзлари, махсус иқтисодий зоналарда ишлаш имкониятлари, экспортни қўллаб-қувватлаш чоралари ва мамлакатнинг барқарор ижтимоий-иқтисодий ўсиш тенденциялари ҳақида батафсил маълумот берилди.

Ўзбекистоннинг сайёҳлик жозибадорлиги ва Хитойдан келган сайёҳлар учун соддалаштирилган шарт-шароитлар, жумладан, визасиз режим ва Хитойнинг турли шаҳарларидан тўғридан тўғри авиарейсларнинг мунтазам равишда йўлга қўйилгани қайд этилди.

Чжэцзян провинциясида саноат, "яшил" энергетика, энергияни тежаш ва янги материаллар ишлаб чиқариш соҳалари жадал ривожланмоқда. Хитой бизнеси Ўзбекистондаги лойиҳаларда иштирок этишга, хусусан, қишлоқ хўжалиги ва сув ресурсларини тежаш соҳаларида ҳамкорлик қилишга қизиқиш билдирди.

Анжуманда мамлакатда ишлаётган Хитойнинг Holley Group компанияси ходимлари Ўзбекистондаги тажрибалари ҳақида сўзлаб берди.

Тадбир якунида Чжэцзян провинцияси компаниялари вакилларидан иборат делегациянинг Ўзбекистонга бизнес-миссиясини ташкил этишга келишиб олинди.