«БААдаги фуқароларимизни тезликда текширувдан ўтказиш учун барча имкониятлар сафарбар этилган» — ТИВ

Ташқи ишлар вазирлигининг маълум қилишича, Ўзбекистоннинг Абу-Даби ва Дубайдаги дипломатик ваколатхоналари БАА идоралари билан фуқароларни тезроқ текширувдан ўтказиш борасида музокара ўтказган ва улар амирликка киришни бошлаган. БАА томони эса турли халқаро тадбирлар муносабати билан аэропортларда текширув вақтлари чўзилганини билдирган.

Фото: Шохрух Ҳайдаров

2 июн куни Жаҳон чемпионати саралаши доирасида БАА–Ўзбекистон ўйинини кўриш учун борган юзлаб ўзбекистонлик мухлислар Шаржа аэропортида 6-7 соат давомида ушлаб турилгани ҳақида хабар берган эдик. Ватандошлар — фақат Ўзбекистон фуқароларининг паспортлари олиб қўйилгани, улардан анкета тўлдириш, меҳмонхона банд қилгани ҳақида ҳужжат ва қайтиш чиптасининг нусхаси сўралганини айтишган.

Орадан 6-7 соат ўтгач, Тошкент вақти билан 14:30 ларда Ўзбекистон фуқароларини аэропортдан ўтказиб юбориш бошланган.

Ўзбекистон Ташқи ишлар вазирлиги ҳолат юзасидан расмий муносабат берди. Маълум қилинишича, БААдаги турли аэропортлар орқали мамлакат ҳудудига кириб келаётган хорижликларнинг, шу жумладан, Ўзбекистон фуқароларининг текширувлари чўзилиб кетаётган ҳолатлар алоҳида мониторинг қилиб борилмоқда.

«Айни пайтда фуқароларимизнинг қонуний ҳуқуқлари ва манфаатларини ҳимоя қилиш учун барча чора-тадбирлар кўрилмоқда. Мамлакатимизнинг Абу-Даби шаҳридаги элчихонаси ҳамда Дубай шаҳридаги Бош консулхонаси БААнинг тегишли ташкилотлари билан ушбу масалада зудлик билан музокаралар ўтказди ва вазиятни яхшилаш бўйича доимий алоқада бўлиб турмоқда. Ҳозирда фуқароларимизни тезлик билан текширувдан ўтказиш учун барча имкониятлар сафарбар этилган ва натижада улар мамлакат ҳудудига кириб келишни бошлаган», дейилади ТИВ матбуот котиби Аҳрор Бурҳонов берган баёнотда.

Шунингдек, Ўзбекистон ТИВ расмийси маълум қилишича, «БАА томони турли халқаро тадбирлар муносабати билан хавфсизлик чоралари кучайтирилгани сабаб аэропортларда текширув вақтлари чўзилиб кетгани»ни билдирган.

Яна ўзбекистонликлар ажратилди: БАА аэропортида 100 дан ортиқ Ўзбекистон фуқаролари ушлаб турилди

Эслатиб ўтамиз, 2024 йил 21 ноябр куни БААнинг Ал-Айн амирлигида Исроил ва Молдова фуқароси, БАА резиденти бўлган роҳиб Цви Коганнинг жасади қотиллик аломатлари билан топилди. Яҳудий роҳибнинг ўлимида Ўзбекистоннинг уч нафар фуқароси айбдор деб топилиб, ўлимга ҳукм қилинди.

Ушбу ҳолат ортидан Ўзбекистон фуқароларининг БААга кириши, меҳнат фаолияти ва виза олишида кўплаб муаммолар бошланди. Хусусан, ўтган йили 25 ноябр куни Ўзбекистоннинг Дубайда меҳнат қилаётган бир гуруҳ фуқаролари полиция томонидан олиб кетилганди. Кейинроқ уларнинг айримлари қўйиб юборилгани, айримлари депортация қилингани ҳамда яна 5 кишига нисбатан жиноий иш очилгани маълум бўлди.

#БАА #аэропорт #Ўзбекистон фуқаролари