Ўзбекистонда географик кўрсаткичлар асосида товар белгилари яратилиши мумкин

Мулоқот чоғида Ўзбекистон ва БИМТ ўртасидаги икки томонлама ҳамкорликни мустаҳкамлаш, илм-фан ва инновацион ишланмаларни қўллаб-қувватлаш масалалари муҳокама қилинди.

Учрашув давомида Ўзбекистон қишлоқ хўжалиги соҳасида амалга оширилаётган ислоҳотлар, жумладан, илмий ёндашувлар, замонавий агротехнологияларни жорий этиш ва инновацион натижалар хусусида маълумот берилди. Айниқса, илмий-тадқиқот институтларининг сўнгги йиллардаги фаолияти, тажриба хўжаликлари билан олиб борилаётган амалий ишлар, селекция ва агробиотехнологиялар йўналишидаги ютуқлар алоҳида таъкидланди.

Мулоқот чоғида илмий ишланмаларни тижоратлаштириш – яъни фан ютуқларини бевосита фермерлар ва агробизнес субъектлари фаолиятига интеграция қилиш механизмлари муҳим мавзулардан бири бўлди. Бу борада интеллектуал мулк объектларини ҳуқуқий ҳимоя қилиш, уларни халқаро миқёсда рўйхатдан ўтказиш, бренд яратиш ва глобал бозорларда тарғиб қилиш долзарб масала сифатида қайд этилди.

Томонлар маҳсулотларни брендлаш, маркетинг стратегияларини ишлаб чиқиш, географик кўрсаткичлар асосида товар белгиларини яратиш ҳамда бу борадаги илғор халқаро тажрибани ўзлаштириш юзасидан фикр алмашдилар. Дарен Танг Ўзбекистоннинг бой агробиологик ресурслари ва минтақавий маҳсулотларини халқаро бозорларда танитиш учун БИМТ томонидан методик ва техник ёрдам кўрсатилишини билдирди.

Шунингдек, агробизнес вакилларининг малакасини ошириш, уларни интеллектуал мулк, маркетинг ва қадоқлаш соҳаларида тайёрлаш бўйича ҳамкорлик йўналишлари белгилаб олинди. Жумладан, БИМТ доирасида қисқа муддатли курслар ва семинарлар ташкил этиш, ўзбек мутахассисларини замонавий билим ва кўникмаларга эга қилиш юзасидан дастлабки келишувларга эришилди.

Учрашув якунида Ўзбекистон ва БИМТ ўртасида инновацион шериклик платформасини яратиш, ҳамкорликни институционал даражада кенгайтириш ҳамда навбатдаги босқич режаларини ишлаб чиқиш бўйича келишувга эришилди.