Германия ташқи ишлар вазири: Украинадаги уруш борасидаги позициямиз АҚШ билан бир хил

Германия ва АҚШ Россиянинг Украинага қарши уруши бўйича умумий позицияга эга, деди Германия ташқи ишлар вазири Йоханн Вадефул 28 май, чоршанба куни Вашингтонга ташрифи чоғида. «Украинага келсак, биз, Германия ва Америка Қўшма Штатлари умумий позицияга эгамиз», — дея унинг сўзларини келтиради AFP. Вазир шундай давом этди: «Энди музокаралар йўли билан ечим топиш керак. Россия эса музокара столига ўтириши керак. Ҳаммамиз буни кутмоқдамиз». Шу мақсадда, дея қўшимча қилди сиёсатчи, Берлин ва Вашингтон кейинги қадамларини мувофиқлаштиришга келишиб олди.

Вадефулнинг сўзларига кўра, агар Россия тинч йўл билан келишувдан бош тортса, Европа ҳам, АҚШ ҳам «тегишли чоралар кўришга» тайёр. У ЕИнинг Москвага қарши 18-санкция пакетини ишлаб чиқиш ва америкалик сенаторларнинг чекловчи чоралар кўришга тайёрлигини эслатди. АҚШ президенти Доналд Трамп, ўз навбатида, давом этаётган ўт очишни тўхтатиш бўйича музокараларга халақит бермаслик учун Россияга қарши санкциялар қўлламаслигини маълум қилди. У яна бир бор томонлар «келишувга яқин» эканини таъкидлади.

Ўша куни Fox News телеканалига берган интервюсида Йоханн Вадефул Украинада тинчликка эришиш истагини яна бир бор таъкидлади: «Ҳамма музокара тарафдори. Ҳамма икки томон ўзаро мақбул ечим топиши тарафдори. Лекин ҳозирда Россия бунга тайёр эмас», — деди у.

Германия ташқи ишлар вазирлиги раҳбари, шунингдек, Европа давлатларини Киевни қўллаб-қувватлашни давом эттиришга чақирди. Унинг эслатишича, бу уруш Россия томонидан бошланган ва у уни тўхтатишга тайёр эмас: «Шундай экан, биз Украинани қўллаб-қувватлашимиз ва ҳақиқатан ҳам ўз ҳудудини ҳимоя қилиш учун зарур бўлган ҳарбий қуроллар билан таъминлашимиз керак».