Британияда 400 мингдан ортиқ давлат хизматчиси сунъий интеллектдан фойдаланишга ўқитилади

Бу ўн минглаб иш ўринлари қисқартирилаётган шароитда уларнинг ишини тезлаштиришга хизмат қилади.

Фото: Getty Images

Англия ва Уэлсдаги барча давлат хизматчилари — 400 мингдан ортиқ одам иш жараёнида сунъий интеллект технологиясидан фойдаланишга ўқитилади. Бу ҳақда The Guardian ўз манбаларига таяниб хабар берди.

Маълумотларга кўра, давлат хизматчилари бундай ўқув жараёнлари ҳақида 9 июн куни хабарномаларни олади. Бу ҳар йили давлат хизматчиларини турли замонавий технологияларга ўқитишга қаратилган One Big Thing лойиҳаси доирасида амалга оширилади.

Таъкидланишича, ўқув жараёнлари давлат хизматчилари самарадорлигини оширишга ва турли ҳукумат муассасаларида ўн минглаб иш ўринлари қисқартирилаётган шароитда уларнинг ишини тезлаштиришга хизмат қилади. Британия ҳукумати олдинроқ давлат хизматчилари ўз ишларини тезроқ ва самаралироқ бажаришлари учун сунъий интеллектдан фаолроқ фойдаланишлари кераклигини маълум қилганди.

Бундан олдин давлат хизматчилари учун мўлжалланган сунъий интеллект воситалари тўпламининг пилот версияси — Humphrey тақдим этилган эди. TechXplore нашрининг маълумотларига кўра, Буюк Британия ҳукумати, шунингдек, Google, Microsoft ва Amazon каби технологик корпорациялар билан ҳамкорлик қилиб, давлат хизматчиларини иш жараёнида сунъий интеллектдан фойдаланишга ўргатмоқчи.

#Буюк Британия #сунъий интеллект