Испанияда юзлаб бошпанасизлар аэропортни «эгаллаб олди»

Испаниянинг энг йирик аэропортларидан бири — Мадрид-Баражасда бошпанасизлар сони кескин ошмоқда, деб хабар беради Daily Mail.

Испания ОАВ маълумотларига кўра, аэропортдаги «рўйхатдан ўтмаган фуқаролар» сони 50 кишидан қарийб 500 кишига қадар ошган.

Қайд этилишича, айниқса вазият 4-сонли терминалда мураккаблашган, чунки расмийлар олдинроқ аэропортнинг бошқа ҳудудларида яшаб келган бошпанасизларнинг аксариятини шу ерга кўчирган. Гувоҳлар ҳожатхоналар поли, экранлар орти ва ресторанлар залида ухлаб ётган инсонларни суратларга олган. Аэропорт ходимлари санитария шароити ёмонлашгани, тажовуз ҳолатларидан шикоят қиляпти — баъзи уйсизлар пичоқ кўтариб, гиёҳванд моддалар ҳам истеъмол қилмоқда.

Яқинда қандалалар кўпайиши хавфи сабаб алоҳида ҳудудларни дезинфекция қилишга тўғри келган. Касаба уюшмалари ходимлари туристларни ҳимоя қилиш ва бошпанасизларни керакли шароитлар билан таъминлаш учун зудлик билан чоралар кўрилишини талаб қилмоқда.

Аэропортдан қўним топганларнинг аксарияти — меҳнат бозоридаги омадсизликлардан кейин бошпанасидан айрилган мигрантлардир. Исми Фернандо бўлган перулик эркакнинг тан олишича, у тунаб кетилиши хавфи борлиги сабаб «бир кўзини очган ҳолда» ухлашга мажбур бўлмоқда. Шу билан бирга, унинг айтишича, барча бошпанасизлар ҳам хавф туғдирмайди ва уларнинг аксарияти шунчаки мураккаб ҳаётий вазиятга тушиб қолган.

Нашрга кўра, расмийлар эҳтимолий чораларни муҳокама қилиб, полиция терминалларни назоратдан ўтказаётган бир пайда полда ухлаётган фуқаролар сони ўсишда давом этмоқда.