Virgin Galactic космосга парвозлар нархини оширади

Миллиардер Ричард Брэнсонга тегишли компания илгари суборбитал парвозлар учун чипталарни ҳар бир ўрин учун тахминан 600 минг доллардан сотган.

Virgin Galactic 2026 йилнинг биринчи чорагида чипта савдосини қайта бошлаганидан сўнг, космик туризм парвозлари учун нархларни оширишни режалаштирмоқда. Bloombergʼнинг ёзишича, компания 2024 йил июнида парвозларни вақтинча тўхтатган.

Миллиардер Ричард Брэнсон асос солган компания илгари суборбитал парвозлар учун чипталарни ҳар бир ўрин учун тахминан 600 минг доллардан сотган. Бироқ 2026 йилда нархлар қанчага кўтарилиши ҳақида ҳозирча маълумот берилмаган.

Virgin Galactic’ка кўра, илмий-тадқиқот миссиясини амалга оширадиган янги космик кеманинг илк парвози 2026 йил ёзига мўлжалланган. Астронавтларнинг парвозлари эса куздан қайта тикланади.

Янгиланган Delta кемалари аввалги моделлардан фарқли равишда тўрт нафар эмас, олти нафар йўловчини сиғдира олади. Компаниядагиларнинг таъкидлашича, улар ҳозирда космосга парвоз қилишни кутаётган мижозлар навбатини тахминан бир йил ичида тугатишга муваффақ бўлади.

Virgin Galactic’нинг сўнгги космик туристик парвози 2024 йил 8 июнда бўлиб ўтган. Унда Туркия, АҚШ ва Италиядан келган йўловчилар иштирок этган ва улар космосда тахминан бир соат вақт ўтказган.

Эслатиб ўтамиз, 2021 йил июл ойида миллиардер Жефф Безос шахсан Blue Origin компаниясининг New Shepard ракетасида коинотга учганди. Ўшанда у билан бирга бортда унинг акаси Марк, 82 ёшли учувчи Уолли Фанк ва 18 ёшли нидерландиялик Оливер Дэмен бўлган. Жорий йилнинг феврал охирларида Blue Origin капсуласи космосга туристик парвозни муваффақиятли амалга оширганди. Апрел ўрталарида эса Blue Origin компанияси фақат аёллардан иборат экипаж билан New Shepard ракетасини учиришга муваффақ бўлди.

#Ричард Брэнсон #Virgin Galactic #космос