Португалияда черковнинг қулаган деворлари орасидан 12 та скелет топилди

Суяклар XVI-XIX асрларга тегишли. Археологлар черков ҳудудидан яна бошқа скелетлар ҳам топилиши мумкинлигини тахмин қилмоқда.

Фото: AP

Португалиянинг Портиман шаҳрида жойлашган XV асрга тегишли черков деворлари қулаб тушганидан кейин камида 12 кишининг жасади қолдиқлари топилди. Тадқиқотчиларнинг таъкидлашича, деворлар орасида бошқа скелетлар ҳам бўлиши мумкин, деб ёзади Popular Mechanics портали.

Қайд этилишича, ушбу воқеа Igreja Matriz de Portimao черковида содир бўлган. Унинг деворлари ноқулай об-ҳаво шароити туфайли қулаб тушган. Зарарни баҳолаш учун мутахассислар воқеа жойига етиб келгач, вайроналар остидан одамларга тегишли суяклар топилган. Топилмани ўрганиш учун археологлар гуруҳи чақирилган.

Дастлабки маълумотларга кўра, ушбу суяклар XVI-XIX асрларга тегишли. Суяклар ёши ва уларнинг жойлашув ўрни, яъни черковнинг ички деворларидан топилгани ҳисобга олинадиган бўлса, улар мазкур ҳудудда жойлашган қабристоннинг бир қисми ҳисобланади. Таъкидланишича, ўтмишда черковлар ҳудудидан тез-тез дафн этиш жойи сифатида фойдаланиб келишган.

Археолог Рита Диаснинг айтишича, қабрлар бири-бирини ёпиб турган: битта қабрдан бир неча юз йил давомида қайта-қайта фойдаланилган. Шунингдек, унинг таъкидлашича, черковларда дафн этиш одати 1869 йилларда санитария сабабларига кўра тўхтатилган. 1863 йилда эса шаҳарда янги қабристон пайдо бўлган.

Археологлар ҳозирда топилган скелетларнинг жинси, ёши ва ўлими эҳтимолини ўрганмоқда. Портиман ҳукумати черков деворларидан яна скелетлар топилиши мумкинлигини тасдиқлаган.

#Португалия #черков #скелетлар