Испания ва Португалияда апрел ойида юз берган блэкаут сабаблари аниқланди

Электр тармоғидаги кучланишни назорат қилиш учун қувватнинг етишмаслиги 28 апрел куни Испания ва Португалияда электр таъминотидаги оммавий узилишга олиб келган занжирли реакцияга сабаб бўлди. Бу ҳақда Испания энергетика вазири Сара Аагесен маълум қилди.

17 июн куни эълон қилинган тергов ҳисоботига кўра, баъзи электр станциялари электр таъминоти узилишидан олдинги дақиқаларда тармоқдаги кучланишни назорат қилолмаган. 

Аагесен сўзларига кўра, «тизим динамик кучланишни назорат қилиш учун етарли имкониятларга эга эмас эди».

Унинг таъкидлашича, электростанциялар «кучланишни назорат қилиши керак эди ва бундан ташқари, уларнинг кўпчилиги бунинг учун иқтисодий жиҳатдан мукофот ҳам олади». Оқибатда улар ғайритабиий юқори кучланиш шароитида кутилган барча реактив қувватни ўзлаштира олмади. Тергов киберҳужумга оид ҳеч қандай далил топмади, деди Аагесен.

Апрель ойи охирида Испания Олий суди электр таъминотининг оммавий ўчирилиши киберҳужум оқибатими ёки йўқлигини аниқлаш учун тергов бошланганини эълон қилди. Судя миллий киберхавфсизлик агентлиги ва электр тармоқлари операторига узилиш сабаблари бўйича ҳисобот тақдим этишни буюрди ва «кибертерроризм кўриб чиқилаётган версиялардан бири» эканини таъкидлади. Шу сабабли, иш махфийлаштирилди.

Электр таъминотидаги кенг кўламли узилиш Пиреней яриморолининг катта қисми ва Франциянинг бир қисмига таъсир кўрсатди. Узилиш вақтида Испания атом электр станциялари тўхтаб қолди, бутун темирйўл инфратузилмаси фалаж бўлди. Узилишдан кўрилган иқтисодий зарар 2,25 миллиард евродан 4,5 миллиард еврогача бўлиши мумкин.