Portugaliyada cherkovning qulagan devorlari orasidan 12 ta skelet topildi

Portugaliyaning Portiman shahrida joylashgan XV asrga tegishli cherkov devorlari qulab tushganidan keyin kamida 12 kishining jasadi qoldiqlari topildi. Tadqiqotchilarning ta’kidlashicha, devorlar orasida boshqa skeletlar ham bo‘lishi mumkin, deb yozadi Popular Mechanics portali.

Qayd etilishicha, ushbu voqea Igreja Matriz de Portimao cherkovida sodir bo‘lgan. Uning devorlari noqulay ob-havo sharoiti tufayli qulab tushgan. Zararni baholash uchun mutaxassislar voqea joyiga yetib kelgach, vayronalar ostidan odamlarga tegishli suyaklar topilgan. Topilmani o‘rganish uchun arxeologlar guruhi chaqirilgan.

Dastlabki ma’lumotlarga ko‘ra, ushbu suyaklar XVI-XIX asrlarga tegishli. Suyaklar yoshi va ularning joylashuv o‘rni, ya’ni cherkovning ichki devorlaridan topilgani hisobga olinadigan bo‘lsa, ular mazkur hududda joylashgan qabristonning bir qismi hisoblanadi. Ta’kidlanishicha, o‘tmishda cherkovlar hududidan tez-tez dafn etish joyi sifatida foydalanib kelishgan.

Arxeolog Rita Diasning aytishicha, qabrlar biri-birini yopib turgan: bitta qabrdan bir necha yuz yil davomida qayta-qayta foydalanilgan. Shuningdek, uning ta’kidlashicha, cherkovlarda dafn etish odati 1869 yillarda sanitariya sabablariga ko‘ra to‘xtatilgan. 1863 yilda esa shaharda yangi qabriston paydo bo‘lgan.

Arxeologlar hozirda topilgan skeletlarning jinsi, yoshi va o‘limi ehtimolini o‘rganmoqda. Portiman hukumati cherkov devorlaridan yana skeletlar topilishi mumkinligini tasdiqlagan.