Аргентина собиқ Адлия вазирлиги биносидан нацистларга тегишли ҳужжатлар архиви топилди

Аргентина Олий суди жойлашган Буэнос-Айресдаги собиқ Адлия саройи ертўлаларидан Германиядаги фашистлар режимининг 1930-1940 йиллардаги фаолиятига оид юзлаб ҳужжатларни ўз ичига олган қутилар топилди, деб хабар беради Clarin нашри.

Қайд этилишича, ҳужжатлар таъмирлаш ва Олий суд музейи учун ертўлаларини тайёрлаш вақтида тасофидан топилган. Ҳужжатлар ўрганиб чиқилгач, Буэнос-Айресдаги Холокост музейига юборилади.

Маълумотларга кўра, қоғозлар Адлия саройи ертўласидаги 12 та ёғоч шампан қутисида сақланган. Ҳужжатлар орасида паспортлар, партия билетлари, пропаганда материаллари, оқ-қора суратлар, варақалар, қайд дафтарлари ҳам мавжуд. Айрим ҳужжатларда Адолф Ҳитлернинг имзосини ҳам учратиш мумкин.

Таъкидланишича, ушбу топилма — 1941 йил июнда Nan-a-Maru кемасида Германиянинг Токиодаги элчихонасидан Аргентинага етказилган 83 қути ҳужжатнинг бир қисми бўлиши мумкин. Айни вақтда архив Холокост музейи мутахассислари ва терговчилар томонидан ўрганилмоқда. Уларнинг вазифаси — ҳужжатларнинг тарихий аҳамиятини баҳолаш ва бутун дунё бўйлаб нацистларнинг «пул излари» билан боғлиқ ҳали аниқланмаган жиҳатларни ёритишга ёрдам берадиган муҳим маълумотлар бор-йўқлигини аниқлашдир.

Аввалроқ Аргентина ҳукумати мамлакатдан бошпана топган юқори мартабали нацистларга боғлиқ ҳужжатларни махфийликдан чиқаргани тўғрисида хабар берилганди. Улар орасида Освенцим концлагери маҳбуслари устида тажрибалар ўтказган ва «Ўлим фариштаси» номини олган шифокор — Йозеф Менгеле ҳам бор.