Японияда 15 ёшгача бўлган болалар сони кескин қисқариб кетди

Японияда 15 ёшгача бўлган болалар сони 1950 йилдан бери юритиб келинаётган статистика тарихида энг паст кўрсаткични қайд этди. Бу ҳақда мамлакат Маъмурий ишлар ва коммуникациялар вазирлиги ҳисоботида сўз боради.

Ҳужжат Японияда нишонланадиган миллий байрам — Болалар куни арафасида эълон қилинган. 1 апрел ҳолатига кўра, мамлакатда 15 ёшгача бўлган болалар сони тахминан 13,7 миллионни ташкил этмоқда — бу бир йил олдинги кўрсаткичдан 350 минг кишига кам.

Ҳисоботда келтирилишича, 124 миллион аҳоли орасида болалар улуши 11,1 фоизни ташкил этмоқда. Ушбу кўрсаткич бўйича Япония БМТ рейтингига кўра, аҳолиси 40 миллиондан ошадиган 37 та давлат орасида охиридан иккинчи ўринни эгаллаб келяпти. Рейтингда охирги ўринни Жанубий Корея эгаллаган — ушбу мамлакатда болалар улуши атиги 10,6 фоизга тенг.

Япония ҳукумати туғилиш даражасини ошириш бўйича чора-тадбирлар кўряпти, хусусан, болали оилалар учун тўланадиган нафақалар оширилиб, бола туғилганида бериладиган таътиллар тизими кенгайтирилмоқда. Аммо буларнинг барчаси кутилган самарани бермаяпти.

Аввалроқ Японияда туғилиш кетма-кет саккиз йилдан бери камаяётгани тўғрисида хабар берилганди. 2024 йилнинг биринчи ярим йиллигида мамлакатда туғилиш рекорд даражада тушиб кетган — 350 минг чақалоқ туғилган. Бу ўтган йилнинг мос даврига нисбатан 5,7 фоизга кам демак. Ўтган йили Токио демографик инқирозга қарши курашнинг янги йўли — тўрт кунлик иш ҳафтасини синаб кўришни бошлаган.