Россиянинг Украинадаги мақсадлари ўзгарди – CNN

Россия Украина билан урушдаги мақсадларини «қисқа муддатли мақсадларга» ўзгартирган бўлиши мумкин, деб ёзди CNN АҚШ ва бошқа Ғарб разведка хизматларидан хабардор манбаларга таяниб.

Телеканал келтирган разведка маълумотларига кўра, Россия томони назоратга олган ҳудудларда «ўз позицияларини мустаҳкамлаш ва мураккаб аҳволга тушиб қолган Россия иқтисодиётини рағбатлантиришга» эътибор қаратмоқчи.

Мақолада CNN билан гаплашган америкалик ва украиналик юқори мартабали амалдорларнинг фикрлари келтирилган. Улардан бири ўзгаришлар Москванинг Вашингтон билан муносабатларини яхшилаш истаги билан боғлиқ деб ҳисоблайди.

Шу билан бирга, суҳбатдошнинг фикрича, Россия ўзининг «максималистик ҳарбий мақсадларидан» воз кечмаяпти, шу жумладан, Украинанинг янги ҳудудларини ўз назорати остига олишдан.

Жорий йилнинг бошида АҚШ разведка хизмати вакиллари президент Доналд Трамп маслаҳатчиларига Россия айнан шундай йўл тутишга интилаётганини айтган эди, деб хабар берди CNN.

Шу ҳафта Кремль президент Владимир Путиннинг мақсадлари ҳарбий амалиёт бошланганидан бери ўзгармаганини айтди: «Биз миллий манфаатларимизни таъминлашимиз керак». Бир ой олдин Путиннинг матбуот котиби Дмитрий Песков ҳам Россия хавфсизлигини таъминлаш мақсадини айтиб, Москва келишувдан манфаатдор эканини таъкидлаган эди.