Путин Волгоград аэропорти номини "Сталинград"га ўзгартирди

Россия президенти Владимир Путин «Волгоград халқаро аэропортига «Сталинград» тарихий номини бериш тўғрисида»ги фармонни имзолади, деб хабар қилди 29 апрель, сешанба куни Кремль матбуот хизмати. Бундан бироз олдин Россия ахборот агентликлари Путин Волгограддаги Гумрак аэропортига «Сталинград» номини бериш ғоясини қўллаб-қувватлагани ҳақида хабар берганди.

Хабарларда айтилишича, бу «Волгоград вилояти аҳолиси, фахрийлар жамоаси, шунингдек, МҲО иштирокчилари» томонидан берилган илтимосдир. Россия ҳукумати Россиянинг Украинага қарши урушини «махсус ҳарбий операция» ёки МҲО деб атайди.

2018 йилда «Россиянинг буюк исмлари» умумроссия танловида овоз беришдан сўнг Волгоград аэропортига афсонавий совет учувчиси Алексей Маресев номини бериш тўғрисида қарор қабул қилинди, у федерал Россия телеканаллари хабарига кўра, «оёқларидан айрилганидан кейин ҳам Улуғ Ватан уруши йилларида душманни мағлуб этишда давом этган». Бироқ, аэропортга Маресевнинг номи берилмади. Волгоград аэропорти Путиннинг 2019 йил 31 майда имзоланган Россиянинг 44 та аэропортига таниқли шахслар номини бериш ҳақидаги фармонига киритилмаган.