Трамп Зеленский ва Путин билан учрашишга тайёрлигини маълум қилди

АҚШ президенти Доналд Трамп зарурат туғилса, Россия ва Украина президентлари билан уч томонлама учрашув ўтказишга тайёр. Бу ҳақда у Оқ уйда журналистларнинг саволларига жавоб бериш вақтида маълум қилди.

Трампга «Энди ҳам Путин урушни тугатишни истайди, деб ҳисоблайсизми?», деган савол берилди. Бунга жавобан у ўзининг махсус вакили Стив Уиткофф Россия томони билан «жуда қаттиқ» мулоқот қилаётганини айтди. Шунингдек, Трамп Путин урушни якунлашни ростдан ҳам хоҳлаяптими ёки йўқлигига икки ҳафтадан кейин «ишора беришини» таъкидлади. 

«Мен сизларга буни айта олмайман, аммо тахминан икки ҳафталардан кейин ишора бераман. Тез орада у [Путин] бизни бирор нимага ундаяптими — буни билиб оламиз, агар шундай бўлса, биз бироз бошқача муносабат билдирамиз», — дейди АҚШ президенти. У, шунингдек, бир неча кун олдин «музокаралар деб аталадиган жараён пайтида одамлар ўлдирилган воқеа»дан «жуда-жуда ҳафсаласи пир бўлганини» маълум қилди.

Бундан ташқари, АҚШ етакчисига нима учун ҳозирга қадар Россияга қарши санкциялар жорий этмагани тўғрисида савол берилди. Буни Трамп эҳтимолий тинчлик келишувини бузмоқчи эмаслиги билан изоҳлади. Шунингдек, у зарурат туғилса, Зеленский ва Путин билан учрашишини қўшимча қилди.

Олдинроқ Володимир Зеленский Владимир Путин ва Доналд Трамп иштирокида уч томонлама учрашув ўтказиш таклифини берганди. Кремл Зеленскийнинг таклифини изоҳлар экан, Россия ва Украина президентларининг учрашуви «икки делегация ўртасидаги турли соҳалардаги аниқ келишувлар натижаси бўлиши кераклигини» билдирди.