Маҳаллий авиарейсларда чипталар охирги уч ойда 1,7 баробарга қимматлади

Ўзбекистонда охирги 3 ойда маҳаллий авиақатновлар учун чипталар нархи 74 фоизга кўтарилди. Статистика қўмитасининг ойлик инфляция ҳисоботларидан келиб чиқадиган бу маълумотга иқтисодчи Отабек Бакиров эътибор қаратди.

Расмий маълумотларга кўра, авиачипталар нархи сўнгги ойларда қуйидагича ошган:

• феврал ойида – ички йўналишларда 1,6 баробарга, халқаро йўналишларда 1,9 фоизга;
• март ойида – ички йўналишларда 3,9 фоизга, халқаро йўналишларда 4,8 фоизга;
• апрел ойида – ички йўналишларда 4,9 фоизга, халқаро йўналишларда 5,3 фоизга.

Шу тариқа, бу даврда парвоз чипталари нархи ички йўналишларда 74,4 фоизга, авиақатновлар ўртасида рақобат кучлироқ халқаро парвозларда эса 12,45 фоизга кўтарилган.

Статқўм маълумотларига кўра, 2025 йил апрел ойида инфляция 0,7 фоизни, йиллик инфляция 10,1 фоизни ташкил этган.

Январ–апрел ойларидаги ўртача ойлик инфляция 0,7 фоиз бўлиб, бу 2023 йилда 0,8 фоиз, 2024 йилда эса 0,6 фоиз эди.

Ўтган ойда хизматлар ўртача 1 фоизга, товарлар 0,6 фоизга, озиқ-овқатлар 0,8 фоизга қимматлагани қайд этилган. Озиқ-овқатлардан асосан гўшт ва ёғ нархлари ўсгани кузатилган.

Апрелда автомобил ва темирйўл транспортида йўловчи ташиш нархлари 1,3 фоизга ўсган. Автотранспортлар учун метан 2,6 фоизга қимматлаган бўлса, бензин 0,4 фоизга, пропан 8,7 фоизга арзонлагани қайд этилган.

Апрел ойидаги инфляцияда ахборот ва алоқа бўлимидаги нархлар сезиларли ошгани муҳим ўринга эга. Ўтган ойда бу бўлимда нархлар 1,4 фоизга, йил бошига нисбатан 3,6 фоизга, охирги 12 ойда эса 6,6 фоизга қимматлаган. Ушбу инфляция мобил алоқа хизматлари тарифларининг ўртача 2,5 фоизга ошиши билан боғлиқ.