«Биз эндигина бошладик». Трамп президентлигининг дастлабки 100 кунидаги ютуқлари билан мақтанди

АҚШ президенти Доналд Трамп Мичиган штатида сўзлаган нутқида ўз лавозимидаги дастлабки 100 кун мамлакат тарихидаги энг муваффақиятли кунлар бўлганини айтди ва ўзининг қатъий иммиграция сиёсатини асосий ютуқлардан бири ва сайловолди ваъдаларининг бажарилиши деб атади.

«Биз бугун мамлакатимиз тарихидаги ҳар қандай маъмуриятнинг энг муваффақиятли дастлабки 100 кунини нишонлаш учун мамлакатимизнинг қоқ марказида йиғилдик ва бу кўпчиликнинг фикрига кўра шундай», – деди Трамп нутқи аввалида. «Биз эндигина бошладик. Сиз ҳали ҳеч нарсани кўрмадингиз», – дея қўшимча қилди у ўз тарафдорларига қарата.

Трамп АҚШ автомобилсозлик саноати маркази бўлган Детройтдан шимолда, Канада билан чегара яқинида жойлашган Уоррен шаҳрида нутқ сўзлади.

Нутқда автомобил саноати мавзуси муҳим ўрин эгаллади. Трампнинг айтишича, унинг солиқ ва божхона сиёсати туфайли АҚШда сектор гуллаб-яшнаши керак. У автомобил компаниялари Мичиганда янги заводлар очиш учун «навбатга тураётгани»ни маълум қилди.

Трамп келгуси ҳафталар ва ойларда унинг маъмурияти «Америка тарихидаги энг йирик солиқ имтиёзлари»ни жорий этишига ваъда берди. Америка «олтин аср» сари кетмоқда – паст истеъмол нархлари, юқори маошлар ва „дунё тарихидаги энг яхши иқтисодиёт“», – дейди Трамп.

У, шунингдек, АҚШнинг импорт божлари жорий этилиши фонида бутун дунёдан етакчилар Оқ уйга келишувлар тузиш учун келаётгани билан мақтанди: «Энди бизни бутун дунёда ҳурмат қилишмоқда. Улар президентингизни кўриш учун бутун дунёдан келишяпти. Улар Ҳиндистондан келишяпти, Франциядан келишяпти, Испаниядан келишяпти. Хитойдан келишяпти. Улар президентингизни кўриш учун бутун дунёдан келишяпти. Улар битим тузмоқчи. Биласиз, биз битимлар тузамиз, лекин бу бизга керак эмас».

Президент ўз нутқида яна бир бор демократлар ҳамда олдинги маъмуриятга ҳужум қилди, шунингдек, ўз лавозимида қабул қилган қарорларини эслатиб ўтди ва оломон олқишлари остида «ҳукуматдан телбалик ва трансгендер мафкурани сиқиб чиқараётгани»ни айтди.

«Биз Американи яна буюк қиламиз ва бу тез орада рўй беради», – дея қўшимча қилган у.

Иммиграция ҳақида гапираркан, Трамп собиқ президент Жо Байден маъмуриятини (у ҳақида ўз нутқида бир неча бор эслаган) ноқонуний муҳожирларга «америкаликларни зўрлаш ва ўлдириш»га йўл қўйганликда айблади.

«Аввалги маъмурият чегарада кенг кўламли босқин уюштириб, тўдалар, картеллар ва террорчилар кириб келишига имкон берди… Мен фахр билан айтишим мумкинки, бу жирканч хиёнатга чек қўйилди», – деди у.

Трамп Вашингтон аллақачон Америка чегараси хавфсизлигини таъминлагани, бироқ «судлар тинчлик бермаётгани» ва АҚШдан «ақл бовар қилмайдиган даражада ёмон» одамларнинг депортация қилинишига тўсқинлик қилишга уринаётганини таъкидлаган.

«Энг ёмонларнинг энг ёмонлари Салвадордаги қамоқхонага жўнатилмоқда», – деган Трамп инсон ҳуқуқлари бузилиши ҳақида хабарлар келиб тушган мегақамоқхонани назарда тутган ҳолда.

Шунингдек, йиғилганларга Салвадорга депортация қилинган ва у ердаги қамоқхона камераларида кишанланган ҳолатдаги муҳожирлар акс этган видеолар намойиш этилди.

Трампнинг нутқи тахминан бир ярим соат давом этди. Унда у ташқи сиёсатга деярли тўхталмаган, фақат Хитой билан савдо шартномаси тузмоқчи эканини айтган.

Трампнинг дастлабки 100 куни президентлик ваколатларидан импорт тарифларини жорий этиш, давлат дастурларини қисқартириш, оммавий депортациялар ва бошқа чоралар учун кенг фойдаланиши билан ажралиб турди.

Трампнинг кўплаб тарафдорлари бу ташаббусларни олқишламоқда, бироқ ижтимоий сўровларга кўра, президент танқидчилари мамлакат қайси йўналишда кетаётганидан хавотирда.

Унинг ўзи республикачилардан кўра демократлар кўпроқ иштирок этадиган сўровларга ишонмаслигини таъкидлаб, америкаликлар орасидаги рейтингини 60-70 фоиздан юқори баҳолайди.

Gallup маълумотларига кўра, Трамп – Иккинчи жаҳон урушидан кейин АҚШнинг ҳокимият тепасида 100 кун ўтирганидан кейин аҳолининг ярмидан камроғи томонидан қўллаб-қувватланган ягона президентидир: сўровларга кўра, унинг рейтинги 44 фоизни ташкил қилади.