ЖССТ келажакдаги пандемиялардан ҳимояланиш режасини тақдим этади

Жаҳон соғлиқни сақлаш ташкилотига (ЖССТ) аъзо давлатлар уч йилдан ортиқ давом этган музокаралардан кейин дунёни келажакдаги пандемияларга тайёрлаш тўғрисидаги келишув лойиҳасини имзолади. ЖССТ матбуот хизматининг маълум қилишича, ҳужжат COVID-19’дан кейин янги патогенлардан ҳимояни кучайтириш бўйича ҳуқуқий мажбуриятга эга.

ЖССТга аъзо барча давлатларга маъқул келадиган ҳужжатни тайёрлаш учун 13 раунддан иборат учрашувлар ўтказилди, уларнинг тўққизтаси узайтирилди, шунингдек, кўплаб норасмий учрашув ва музокаралар ҳам ташкил этилди.

Жаҳон соғлиқни сақлаш ташкилоти раҳбари Тедрос Гебрейесуснинг сўзларига кўра, «бугун Женевада дунё давлатлари тарих яратди».

Ҳужжат пандемиялар даврида давлатларнинг ҳаракатларини мувофиқлаштириш бўйича барча зарур чораларни, жумладан, дори-дармонлардан фойдаланиш имкониятини таъминлаш, кенг қамровли тадқиқотлар ўтказиш, соғлиқни сақлаш соҳаси мутахассисларини тайёрлаш, фавқулодда вазиятларда кадрлар ресурсларини сафарбар этиш ва бошқа кўплаб чораларни назарда тутади.

Май ойида ушбу битим лойиҳаси ЖССТнинг олий раҳбарлик органи — Жаҳон соғлиқни сақлаш ассамблеяси томонидан кўриб чиқилади.

Аввалроқ ЖССТ раҳбари янги пандемия дунёда ҳатто «эртага» бошланиши мумкинлиги ҳақида гапирганди. Гебрейесусга кўра, унга қарши самарали кураш олиб бориш учун жаҳон мамлакатлари тегишли халқаро келишув тузиши керак.