OpenAI сунъий интеллект асосидаги браузерини ишга туширади

Компания браузерда ChatGPT’га ўхшаш чатдан фойдаланади. Бу фойдаланувчилар бошқа сайтларга ўтмаслиги учун мўлжалланган.

Фото: Reuters

OpenAI компанияси яқин ҳафталар ичида сунъий интеллект базасидаги веб-браузерини ишга туширади, деб ёзмоқда Reuters.

Қайд этилишича, OpenAI браузерининг интерфейси шундай ишланганки, амалиётларнинг бир қисми ChatGPT’га ўхшаш чатда амалга оширилади ва бошқа сайтларга мурожаат қилишга ҳожат қолмайди.

Chrome браузери Google бизнеси учун катта аҳамиятга эга, унга рақобатчи бўладиган браузернинг ишга туширилиши эса корпорацияга таҳдид уйғотади. Reutersʼга кўра, Google ўзининг браузери орқали рекламани аниқроқ таргетлаш учун фойдаланувчиларга оид маълумотларни кўпроқ тўплайди. Бундан ташқари, фойдаланувчилар автоматик равишда Google қидирув тизимидан фойдаланади.

Манбаларнинг таъкидлашича, OpenAI браузери Chromium очиқ коди асосида ишлаб чиқилган. Корпорациянинг бошқа раоқбатчилари, масалан, Microsoft ва Opera ҳам айнан шу коддан фойдаланади.

АҚШ Адлия вазирлиги Googleʼни бўлиб юборишга ва монополияга барҳам бериш мақсадида Chrome браузери сотилишига эришмоқчи. Компания эса бундай ҳаракат унинг бизнесига зиён етказишини таъкидламоқда. OpenAI агар бўлиниш амалга ошса, Chrome’ни харид қилишга қизиқиш билдирган.

Chrome — браузерлар орасида дунёда етакчи, унинг улуши қарийб 64 фоиз. Иккинчи ўринда 22 фоиз билан Safari, учинчи поғонада эса 5 фоизли кўрсаткич билан Edge боради.

#браузер #Google Chrome #OpenAI