Дунёда ҳар соатда 100 нафарга яқин одам ёлғизликдан вафот этади - ЖССТ

Дунёда ҳар соатда юзга яқин одам ёлғизликдан вафот этади. Бу ҳақда Жаҳон соғлиқни сақлаш ташкилотининг (ЖССТ) сўнгги ҳисоботида айтилган.

Ҳужжатда қайд этилишича, дунёдаги ҳар олтинчи одам ёлғизликдан азият чекади, бу эса уларнинг соғлиғига салбий таъсир қилади. Ёлғизлик билан боғлиқ муаммолар йилига 871 мингдан ортиқ ўлимга олиб келади - бу соатига тахминан 100 киши.

ЖССТ экспертлари ёлғизлик ва ижтимоий изоляция инсулт, юрак хасталиги, диабет, когнитив функцияларнинг пасайиши ва бевақт ўлим хавфини оширишини батафсил баён қилди.

ЖССТ таъкидлашича, бундан ташқари, ёлғиз одамлар депрессияга тушиш эҳтимоли икки баравар кўп. Ёлғизлик кўпинча ташвиш ва ўз жонига қасд қилиш ҳақида салбий фикрларга олиб келади. Бундан ташқари, ёлғиз одамларга сифатли таълим олиш ёки яхши иш топиш қийинроқ.

Шуниси эътиборга лойиқки, кўпинча ёлғизликни ўсмирлар ва ёшлар (барча ҳолатларнинг чорак қисмигача), шунингдек, кам таъминланган одамлар ҳис қилишади.

Ёлғизлик сабаблари орасида мутахассислар соғлиғининг ёмонлиги, паст даромад ва таълим даражаси, етарли даражада инфратузилма ва давлат сиёсати йўқлиги, шунингдек, рақамли технологияларнинг ортиб бораётган ролини таъкидлайдилар.

2023 йилда ЖССТ ёлғизликни инсон саломатлиги учун глобал таҳдид деб эълон қилди. Унинг одамга зарарли таъсири кунига 15 дона сигарет чекиш билан баробар.