Избоскандаги портлаш оқибатида 3 киши ҳалок бўлган — ФВВ

Андижон вилояти Избоскан туманидаги масжид таҳоратхонасида газ портлаши оқибатида уч киши ҳалок бўлиб, 10 киши жароҳатланган. Бу ҳақда ФВВ матбуот хизматининг ҳолат юзасидан қўшимча маълумотида маълум қилинди.

«Бугун, 31 март куни соат 12:19 да Андижон вилояти, Избоскан тумани «Мирзо Улуғбек» МФЙ, Янгибозор кўчасида жойлашган масжид ҳудудидаги таҳоратхонада газ-ҳаво аралашмасининг чақнаши содир бўлганлиги тўғрисида Андижон вилояти ФВБга хабар қилинган.

Зудлик билан айтилган манзилга 2 та қутқарув отряди ва 2 та ёнғин-қутқарув экипажи етиб борган. Ҳодиса натижасида таҳоратхона девор ва том конструкцияларига зарар етган, ёнғин содир бўлмаган.

Чақнаш оқибатида 3 нафар фуқаро М.Абдуллаев, Ж.Анваров ва Б.Бурхонов ҳалок бўлган, 10 нафар фуқаро Ғ.Тойлоқов, А.Абдирайимжонов, Ҳ.Зуҳриддинов, И.Раҳимов, М.Маматураимов, И.Шомуродов, К.Қосимов, У.Болтабоев, М.Абдураҳмонов ва М.Болтабоев тан жароҳати олиб, шифохонага юборилган», дейилади хабарда.

Воқеа жойига вилоят ҳокими, ФВБ, ИИБ, МГ, ССБ, прокуратура ва «Ҳудудгазтаъминот», туман ФВДқТ хизматлари куч воситалари етиб бориб, ҳодиса оқибатлари бартараф этилмоқда.

Ҳодиса содир бўлгани хабар қилинганида водийда бўлиб турган Бош вазир ўринбосари О.Раматов ҳамда Фавқулодда вазиятлар вазири генерал-майор Б.Қудратхўжаев Избоскан туманига етиб борган.

Ҳозирда мазкур ҳолат юзасидан дастлабки терговолди суриштирув ишлари олиб борилмоқда.

Дастлабки хабарларда жароҳатланганлар сони 6 нафарлиги айтилган, кейинроқ бу миқдор 9 нафарга етгани хабар қилинганди.