Сирдарёда ИИБ бошлиғи ўринбосари пора олишда айбланди

Боёвут тумани ИИБ бошлиғи ўринбосари – жамоат хавфсизлиги бўлими бошлиғи лавозимида ишлаб келган Жаҳонгир Ҳасанбоевга суд ҳукми ўқилди. У пора олганликда айбланган.

Kun.uz ўрганган суд ҳужжатида келтирилишича, Жаҳонгир Ҳасанбоев 2005 йилдан Сирдарё вилояти ИИБ тизимида ишлаб келган. У 2024 йил май ойидан қамоққа олингунга қадар эса Боёвут тумани ИИБ бошлиғи ўринбосари лавозимида фаолият юритган.

Жаҳонгир Ҳасанбоев туман ИИБ тергов бўлими иш юритувидаги қимор ва таваккалчиликка асосланган ўйинлар ташкил этиш ҳолати билан боғлиқ жиноят иши доирасида гумонланувчиларга қамоққа олиш тарзидаги эҳтиёт чораси қўлламасликни таъминлаб беришни ваъда қилган. У ушбу “хизмати” учун 10 минг АҚШ доллари сўраган.

2024 йил 10 сентябр куни ҳуқуқни муҳофаза қилувчи органлар томонидан Гулистон шаҳрида тезкор тадбир ўтказилган. Унда Жаҳонгир Ҳасанбоев келишилган 10 минг АҚШ долларини олганда ашёвий далиллар билан қўлга олинган.

Жаҳонгир Ҳасанбоев судда айбига тўлиқ иқрорлик билдирган. У ушбу пулларни жигари касаллиги сабабли даволанишга ишлатмоқчи бўлганини, ёрдам бераман дея алдаб олганини, аслида ёрдам бериш нияти бўлмаганини айтган.

“10 минг АҚШ долларини Боёвут туман ИИБ ҳузуридаги тергов бўлими иш юритувида бўлган жиноят иши юзасидан қамоқ эҳтиёт чораси қўлланмаслигида ёрдам беришини айтиб, алдаб олганман. Аслида ҳеч қандай ёрдам бермоқчи эмасдим. Жигарим касаллиги сабабли ушбу пулларни даволанишга ишлатмоқчи эдим. Агарда жиноят иши доирасида гумонланувчи қамалмай қолса, унга мен ёрдам бердим деб пулларни олиб қолмоқчи, агарда қамалиб кетса ёки иш жиддийлашса, эплолмадим дея пулларни қайтариб бермоқчи бўлдим. Пулни бирон бир мансабдор шахс ёки ўзим билан бирга ишлайдиган ҳамкасбларим, терговчиларга бериш ниятим бўлмаган”, деган у ўз кўрсатмасида.

Суд ҳукми билан Жаҳонгир Ҳасанбоев Жиноят кодексининг 25,168-моддаси 3-қисми “а, в” бандлари ҳамда 28,211-моддаси 2-қисми “б” бандида назарда тутилган жиноятни содир қилганликда айбли деб топилган. Суд Ҳасанбоевда жигар хасталиги борлиги сабабли Жиноят кодексининг 57-моддасини қўллаб, озодликдан маҳрум қилиш билан боғлиқ бўлмаган жазо тайинлаган. Яъни унга 2 йил давлат иштирокидаги ташкилотларда ҳамда раҳбарлик ва моддий жавобгарлик юклатилган вазифаларда ишлаш ҳуқуқидан маҳрум қилган ҳолда 4 йил 8 ой муддатга озодликни чеклаш жазоси берилган.

Айни шу суд ҳукми билан Баҳодир Мирзаев ҳамда Бекзод Ҳабибов ҳам судланган. Улар ҳам алоҳида ҳолатларда юқоридаги жиноят иши доирасида гумонланувчиларга танишлари орқали қамоқ эҳтиёт чораси қўлланмаслигини таъминлаб бериш учун пул талаб қилишган. Ушбу мақсадда Баҳодир Мирзаев 3 минг, Бекзод Ҳабибов эса 30 минг АҚШ доллари олганда тезкор тадбирда ушланган.

Суд ҳукми билан Баҳодир Мирзаевга 2,5 йил, Бекзод Ҳабибовга эса 5,5 йил муддатга озодликдан маҳрум қилиш жазоси тайинланган.