SpaceX кемаси ХКСга муваффақиятли уланди

SpaceX капсуласи 16 март куни эрталаб тўрт нафар астронавтни Халқаро космик станцияга (ХКС) етказди, деб хабар беради BBC.

Қайд этилишича, 29 соатлик парвоздан кейин Crew Dragon капсуласи ХКСга муваффақиятли уланган. Boeing капсуласи сабаб станцияда қолишга мажбур бўлаётган NASA астронавтлари Бутч Уилмор ва Суни Уилямс энди яқин кунларда Ерга қайтади.

ХКСга етиб борган Crew-10 миссияси тўрт кишидан иборат: NASA астронавтлари Энн МакКлейн ва Никол Айерс, япониялик астронавт Такуи Ониси ва россиялик космонавт Кирилл Песков. Ерга эса Бутч Уилмор, Суни Уилямс, Ник Хейг ва Александр Горбунов қайтади.

Уилмор ва Уилямс ХКСда саккиз кун қолиши керак эди, аммо Starliner космик кемасида кузатилган техник муаммо сабаб уларнинг станциядаги фаолияти тўққиз ойга чўзилиб кетди.

Янги экипаж етиб борганидан икки кун ўтиб, уйга қайтиш саёҳати бошланади. NASA вакили Стив Стич астронавтлар қайтаётганидан хурсанд эканини айтиб, уларга миннатдорчилик билдирди.

Астронавтлар бир неча бор станцияда қолиш уларга ҳеч қандай ноқулайлик туғдирмаётганини таъкидлаган, аммо космосда узоқ вақт қолиш уларнинг оилавий ҳаётига салбий таъсир кўрсатиши мумкин.

Бутч Уилмор ва Суни Уилямс ХКСга 2024 йил июнда Starliner синови учун борганди, аммо кемада техник муаммо кузатилиб, уларнинг миссияси узайтирилди. NASA таваккал қилмасликка ва астронавтларни олиб келиш учун SpaceX’нинг Dragon капсуласини жўнатишга қарор қилди.

Boeing компанияси Starliner астронавтларни хавфсиз қайтариши мумкинлигини билдирган, Анно NASA хавфсизлик нуқтаи назаридан SpaceX’ни танлаган.