Кеч нонушта қилиш депрессияга олиб келиши мумкин — тадқиқот

Олимлар нонуштани кечиктириш ёки ундан воз кечиш уйқу ва жисмоний фаоллик билан боғлиқ муаммоларга сабаб бўлишини ҳам таъкидламоқда.

Фото: Shutterstock

Хитойлик олимлар эрталаб соат тўққиздан кейин нонушта қиладиган одамларда депрессия аломатлари 28 фоизга кўпроқ учрашини аниқлади. Тадқиқот натижалари The Journal of Affective Disorders журналида чоп этилди.

Сиан университети Биринчи клиник шифохонаси тадқиқотчилари 11 йил мобайнида 24 мингга яқин катта ёшли одамларнинг овқатланиш рационини ўрганиб, уларнинг соғлиғидаги ўзгаришларни кузатган. Олимлар синов иштирокчилари эрталаб мунтазам нонушта қилиш-қилмасликларини, шунингдек, куннинг қайси пайтида биринчи марта овқатланишини қайд этиб борган.

Тадқиқотлар кўрсатишича, эрталаб соат тўққиздан кейин нонушта қиладиган эркаклар ва аёлларда кайфият ёмонлашуви ва руҳий саломатлик муаммолари, соат 08:00 гача нонуштани тугатадиган кишиларга нисбатан деярли учдан бир қисмга кўпроқ кузатилган. Шунингдек, нонуштадан бутунлай воз кечиш ҳам худди шундай салбий натижа кўрсатиши аниқланди.

Нонуштани кечиктириш ёки умуман қилмаслик уйқу муаммоларига, жисмоний фаолликнинг пасайишига ёки ҳаётий иштиёқнинг сусайишига сабаб бўлиши мумкин, деб таъкидламоқда олимлар.

Аввалроқ россиялик эндокринолог ва диетолог Оксана Михалева нонушта қилмаслик диабет ва семизликка олиб келиши мумкинлигидан огоҳлантирган эди.

#тадқиқот #саломатлик #нонушта #депрессия