Samsung букиладиган смартфонларнинг янги авлодини намойиш этди 

Samsung компанияси Samsung Galaxy Unpacked онлайн тадбири давомида букиладиган смартфонларнинг янги авлоди - Galaxy Z Fold5 ва Galaxy Z Flip5 ни намойиш этди. Янги қурилмалар савдоси 11 август куни старт олади. Galaxy Z Fold5 нархи $1,8 минг, Galaxy Z Flip5 нархи $1 мингдан бошланади. 

Ҳар иккала қурилма мукаммаллаштирилган Flex Hinge шарнирига эга корпус билан таъминланган. У букиладиган қисмлар орасидаги ёриқларга барҳам беради ва экран очилганида букилган жойининг кўринмас бўлишини таъминлайди. 

Смартфон рамкаси мустаҳкам алюминийдан ясалган ва ҳимояланган Corning Gorilla Glass Victus 2 ойнасига эга. Шунингдек, смартфонлар IPX8 стандарти бўйича намликдан ҳимояланган. 

Galaxy Z Fold4 смартфони 6,2 дюймли ташқи дисплейга (2316х904) ва 7,6 дюймли ички (2176х1812) экранга эга. Уларнинг янгиланиш частотаси 120 Гц ва HDR10+ стандартини қўллаб-қувватлайди. Қурилма Qualcomm компаниясининг Snapdragon 8 Gen 2 чипи билан жиҳозланган, 12 Gb тезкор ва 256 ёки 512 Gb ёки 1 Tb ички хотирага, симли ва тезкор симсиз қувватлаш имконини берувчи иккита 4400 мА•с аккумуляторга эга. 

Смартфон тескари қувватлантириш функциясига эга, у бошқа Samsung аксессуарларини қувватлантириш имконини беради. Шунингдек, 2 та SIM-карта билан ишлайди (eSIM ҳам бор). 

Смартфоннинг олд камераси 10 Мп, ички дисплей 4 Мп экраности камерасига эга. У фақат фойдаланилган вақтда «кўриниш беради». Асосий модуль 3 та қисмдан иборат: ультракенг — 50 Мп, кенг бурчакли — 12 Мп, телеобъектив — 12 Мп. Galaxy Z Fold5 учун янги S Pen стилуси ишлаб чиқилган. У енгилроқ вазнга эга, бироқ, смартфонда ўрнатиладиган жойи йўқ. Уни алоҳида сотиб олинадиган чехолда сақлаш тавсия қилинади. 

Z Flip5 компакт смартфони жиддий янгиланган. У 3,4 дюйм ташқи экранга (748х720) ва 6,7 дюйм асосий экранга (2640x1080) эга. «Раскладушка» ҳам Snapdragon 8 Gen 2 чипи билан жиҳозланган, аммо фақат 8 Gb тезкор хотира, шунингдек, 256 ёки 512 Gb ички хотирага эга. Унинг камералари оддийроқ: олд камера 10 Мп ва асосий иккита камера 12 Мп — ҳар иккаласи 4K видеони суратга олади. Аккумулятор 3700 мА•с ва симли, тезкор симсиз, тескари қувватлантириш функциясига эга. 

Ҳар иккала смартфон янгиланган Android операцион тизими билан таъминланган. У букиладиган смартфонлар учун мўлжалланган янги функцияларга эга.