The Korea Times: LG, Samsung ва Hyundai Россияга қайтиш имкониятини ўрганмоқда

Жанубий Кореянинг Samsung, LG Electronics ва Hyundai компаниялари Россия—Украина урушини тўхтатиш бўйича ўтказилаётган музокаралар фонида РФ бозорига қайтиш имкониятларини кўриб чиқмоқда, деб ёзади The Korea Times.

Газета маълумотларига кўра, LG Москва областида жойлашган заводи фаолиятини қисман тиклаган. Россиянинг «Русбейс» нашри ҳам бир неча кун олдин ўз манбаларига таяниб, бу ҳақда хабар берганди. LG вакилларининг таъкидлашича, иш фаолиятининг қайта тикланиши «уруш бошланганидан бери туриб қолган ишлаб чиқариш қувватлари емирилишининг олдини олиш» билан боғлиқ. Заводга янги етказиб беришлар амалга оширилмаган, у ердаги мавжуд материаллардан фойдаланилган.

LG Electronics бош директори Чо Жу Ваннинг маълум қилишича, компания «ҳали уруш тугамагани учун эҳтиёткорлик билан ҳаракат қилмоқда». Аммо у «вазиятни диққат билан кузатиб боришаётгани, санкциялар ечилиши билан ишлар қайта тикланиши»ни қўшимча қилган.

Нашрнинг қайд этишича, Hyundai ҳам Россияга қайтиш имкониятини ўрганиб чиқмоқда. Hyundai Motor Group расмий вакилининг маълум қилишича, «қарор ҳали қабул қилинмаган, компания вазият ривожини кузатмоқда».

Samsungʼнинг Россия бозорига қайтиш имкониятига оид тафсилотларни эса нашр келтирмаган.

Март ўрталарида The Bell нашри Россия—Украина уруши бошланганидан кейин РФдан чиқиб кетган Ғарб компаниялари ўртасида сўровнома ўтказиб, уларнинг ушбу бозорга қайтиши билан қизиққан эди. Журналистлар 60 дан ортиқ хориж компаниясига сўров юборган. Уларнинг 21 таси жавоб қайтарган бўлиб, ҳеч бири Россияга қайтиш режасини тасдиқламаган.