Имтиёзли шартда пенсияга чиқиш ҳуқуқини берувчи ишлар ва касблар рўйхати тасдиқланади

Ҳужжатда айтилишича, амалдаги имтиёзли шартларда пенсияга чиқиш ҳуқуқини берувчи ишлаб чиқаришлар, муассасалар, ишлар, касблар, лавозимлар ва кўрсаткичларнинг рўйхатларига 27 йил давомида бир неча маротаба ўзгартиришлар киритилган.

Вазирлар Маҳкамасининг “Имтиёзли шартларда пенсияга чиқиш ҳуқуқини берувчи ишлаб чиқаришлар, ишлар, касблар ва кўрсаткичлар рўйхатини тасдиқлаш ҳамда мазкур рўйхатларни қўллаш тартиби тўғрисида”ги қарори лойиҳаси 3 та иловадан иборат бўлиб, шундан биринчи иловаси имтиёзли шартларда пенсияга чиқиш ҳуқуқини берувчи ишлаб чиқаришлар, муассасалар, ишлар, касблар, лавозимлар ва кўрсаткичлар рўйхатидан иборат.  

Қарор лойиҳаси билан имтиёзли шартларда пенсияга чиқиш ҳуқуқини берувчи ишлаб чиқаришлар, муассасалар, ишлар, касблар, лавозимлар ва кўрсаткичларнинг 1-, 2-, 3-сонли рўйхатларига ўзгартириш ва қўшимчалар киритиш учун ҳужжатларни тайёрлаш ва тақдим этиш тартиби тўғрисидаги ҳамда имтиёзли шартларда пенсияга чиқиш ҳуқуқини берувчи ишлаб чиқаришлар, муассасалар, ишлар, касблар, лавозимлар ва кўрсаткичларнинг рўйхатларини қўллаш тартиби тўғрисидаги низомларни тасдиқлаш кўзда тутилган.

Қарор лойиҳаси қабул қилиниши натижасида:

имтиёзли шартларда пенсияга чиқиш ҳуқуқини берувчи ишлаб чиқаришлар, муассасалар, ишлар, касблар, лавозимлар ва кўрсаткичларнинг рўйхатлари давлат тилида қабул қилинишига;

амалдаги норматив ҳужжатлардан юқори кучга эга бўлган ҳужжат амалиётга татбиқ қилинишига;

“Ягона миллий меҳнат тизими” идоралараро дастурий-аппарат комплексига имтиёзли шартларда пенсияга чиқиш ҳуқуқини берувчи лавозимлар рўйхати ҳамда ушбу лавозимларда ишлаган фуқаролар тўғрисидаги маълумотлар киритилишига;

фуқароларнинг имтиёзли шартларда пенсияга чиқиш ҳуқуқини амалга оширилишида ортиқча оворагарчиликлар олдини олишга эришилади.