Samsung компанияси Apple’да бўлмаган гаджетни чиқаради

Жанубий Кореянинг Samsung компанияси на Apple, на бошқа йирик электроника компанияларида бўлмаган гаджетни ишлаб чиқармоқчи.

Naver хабарига кўра, бу – саломатлик кўрсаткичларини назорат қилувчи ақлли узук. IT гиганти аллақачон уни ишлаб чиқиш жараёнини бошлаган. Samsung октябрь ойида шунга ўхшаш қурилмага патент олган эди.

Ақлли узуклар электрониканинг янги тури эмас, бундай гаджетлар аллақачон бозорда бор, аммо ҳозирча уларнинг ассортименти кичик ва унчалик таниқли бўлмаган компаниялар томонидан ишлаб чиқарилади.

Манбаларга кўра, ҳалқага камида иккита махсус датчик ўрнатилади. Улар фойдаланувчига юрак уриш тезлигини, ЭКГ ва қоннинг кислород билан тўйинганлик даражасини аниқлаш имконини беради. Ҳозирча Samsung ақлли узукни қачон сотувга чиқаришни режалаштираётгани ҳақида маълумот йўқ.

Samsung Electronics ўз гаджетларида саломатликни назорат қилувчи функцияларни мунтазам татбиқ қилмоқда. Масалан, янги Galaxy Watch 5 ақлли соатида қон босимини ўлчовчи, электрокардиограмма олувчи ва қоннинг кислород билан тўйинганлик даражасини аниқловчи датчиклар бор. Шунингдек, гаджет тана ҳароратини ҳам ўлчай олади.