AQShning Kiyevdagi sobiq elchisi: Trampning Ukrainaga bosimi tufayli ketdim

AQShning Ukrainadagi sobiq elchisi Brijit Brink bu lavozimdan ketishini AQSh prezidenti Donald Tramp va Rossiya o‘rtasidagi yaqinlashish bilan izohladi. «Afsuski, Tramp ma’muriyatining siyosati boshidanoq Rossiyaga emas, qurbon bo‘lgan Ukrainaga bosim o‘tkazishdan iborat edi. Shuning uchun men endi hukumat siyosatini sodiqlik bilan amalga oshira olmadim va iste’foga chiqishni o‘zimning burchim deb bildim», — deb yozdi Brink 16 may, juma kuni chop etilgan Detroit Free Press gazetasi ruknida.

Qo‘shma Shtatlar manfaatlarini himoya qilishning yagona yo‘li, deb hisoblaydi Brink, «demokratiyani himoya qilish va avtokratlarga qarshi turish». «Har qanday sharoitda ham tinchlik, bu - tinchlik emas, bu tinchlantirishdir. Va tarix bizga tinchlanish xavfsizlik yoki farovonlikka olib kelmasligini qayta-qayta o‘rgatgan. Bu ko‘proq urushlar va azob-uqubatlarga olib keladi», deyiladi matnda. «Tinchlanish» deganda 1930-yillarda Fransiya va Buyuk Britaniyaning Germaniyaga nisbatan yon berish siyosati nazarda tutiladi, deb xabar beradi AFP.

Diplomat Rossiyaning Ukrainadagi harakatlarini «yovuzlik» deb atadi. «Biz (AQSh) bu urushga qanday barham berishimiz do‘stlarimizga ham, dushmanlarimizga ham ko‘p narsani ko‘rsatadi», deb ta’kidladi Brink.

2022 yil bahorida AQShning Kiyevdagi elchisi etib tayinlanishidan oldin Brijit Brink boshqa joylarda qatori Slovakiya, O‘zbekiston va Gruziyada ham xizmat qilgan. U AQSh Davlat departamentida qariyb 30 yillik xizmatga ega. Brink Sharqiy Yevropa va Kavkaz bo‘yicha mutaxassis va rus tilini biladi. U AQShning Ukrainaga harbiy yordami tarafdori sanaladi.