Energiya samaradorligi milliy agentligi nimalar bilan shug‘ullanadi?

Hujjat bilan Vazirlar Mahkamasi huzuridagi Energiya samaradorligi milliy agentligi to‘g‘risidagi nizom tasdiqlandi.

Agentlik energiya samaradorligi sohasida yagona davlat siyosatini yuritish, sohada rag‘batlantiruvchi va ta’sir etuvchi choralarni ishlab chiqish va tartibga solish davlat siyosatini amalga oshiruvchi mustaqil respublika ijro etuvchi hokimiyat organi hisoblanadi.

Agentlikning asosiy vazifalari:

• energiya tejashdan daromad oluvchi energiya servis kompaniyalari xizmatlari bozorini rivojlantirish;
• energiya samaradorligi yuqori bo‘lgan loyihalar portfelini shakllantirish va ularni amalga oshirish uchun xususiy investitsiyalarni jalb qilish;
• energiya samaradorligini oshirish sohasida professional kadrlar tayyorlash, qayta tayyorlash va malakasini baholab borishni tashkil qilish;
• aholi va tadbirkorlar o‘rtasida energiya resurslaridan oqilona foydalanish va isrof qilmaslikka asoslangan turmush tarzi va fe’l-atvorni shakllantirishga qaratilgan energiya iste’moli madaniyatini oshirish axborot kampaniyalarini tashkil etish va moliyalashtirish.

Agentlikning Energiya samaradorligini rag‘batlantirish va qo‘llab-quvvatlash jamg‘armasi mablag‘larini shakllantirish va ulardan foydalanish tartibi to‘g‘risidagi nizom tasdiqlanmoqda.

Jamg‘arma mablag‘lari hisobidan energiya samaradorligini oshirish bilan bog‘liq ishlarni amalga oshirish sohasida monitoring qilish, targ‘ibot ishlarini tashkil etish, mutaxassislarni tayyorlash, qayta tayyorlash va ularning malakasini oshirish, ilmiy-tadqiqot faoliyatini olib borishga yo‘naltirilgan energiya samaradorligini oshirish bilan bog‘liq tadbirlar va loyihalar moliyalashtiriladi.

Jamg‘arma mablag‘lari quyidagi manbalar hisobidan shakllantiriladi:

• davlat ulushi bo‘yicha dividendlar hisobidan neft-gaz va elektr energetikasi tarmoqlari korxonalarining sof foydasidan 5 foiz miqdoridagi o‘tkazmalar;
• xalqaro moliya institutlari va xorijiy hukumat moliya tashkilotlarining kreditlari va grantlari;
• Jamg‘arma aktivlarini boshqarish, shu jumladan, bo‘sh turgan mablag‘larni tijorat banklari depozitiga joylashtirishdan olinadigan daromadlar;
• yuridik va jismoniy shaxslarning homiylik xayriyalari;
• qonunchilik hujjatlarida taqiqlanmagan boshqa manbalar.