ЕИ давлатлари Россияга қарши санкцияларнинг 17-пакетини тасдиқлади

Европа Иттифоқи кенгаши Россияга қарши санкцияларнинг 17-пакетини тасдиқлади. ЕИнинг ташқи ишлар ва хавфсизлик сиёсати бўйича олий вакили Кая Калласга кўра, санкциялар Кремлнинг «деярли 200 та соядаги танкерига» таъсир кўрсатади.

«Янги чоралар, шунингдек, гибрид таҳдидлар ва инсон ҳуқуқларига қаратилган. Россияга қарши янги санкциялар устида ҳам иш олиб борилмоқда. Россия урушни қанча узоқ давом эттирса, бизнинг жавобимиз шунчалик қаттиқ бўлади», — деб ёзади Каллас Х ижтимоий тармоғидаги саҳифасида.

«Соядаги флот»дан ташқари, 35 та компанияга нисбатан ҳам чекловлар қабул қилинган. Улар орасида Россия ҳарбий заводларига қурол ишлаб чиқаришда зарур бўладиган компонентларни етказиб берадиган Қозоғистон, Ўзбекистон, Сербия, Туркия ва БААдаги компаниялар ҳам мавжуд. Шунингдек, «Сургутнефтегаз», «ВСК» суғурта компанияси ва ҳарбийлар учун дронлар ишлаб чиқарувчи марказ ҳам чекловларга учради.

«KamAZ» бош директори Сергей Когонинга қарши ҳам чекловлар кўзда тутилган. Шунингдек, инсон ҳуқуқларини бузгани учун 28 киши «қора рўйхат»га киритилади. Улар орасида сиёсий маҳбус Алексей Гориновга ҳукм чиқарган судя Олеся Манделеева ва ушбу суд жараёнида давлат айбловчиси сифатида қатнашган Светлана Журавлёва ҳам бор. Қолганлар ҳам судялар, прокурорлар, терговчилар ва бир нафар Жазони ижро этиш федерал хизмати амалдори ҳисобланади.

Шунингдек, «Кимёвий қуролларни тарқатиш ва улардан фойдаланиш» билан боғлиқ алоҳида рўйхат ҳам тасдиқланди. Унинг таркибига Россия Мудофаа вазирлигининг Радиация, кимёвий ва биологик мудофаа қўшинлари ва иккита идоравий илмий-тадқиқот институтлари киритилган.