Трамп Истанбулдаги Украина-Россия музокараларида иштирок этиши мумкин

АҚШ президенти Доналд Трамп Истанбулга 15 май куни, Россия ва Украина ўртасида уруш бўйича музокаралар ўтказилиши мумкин бўлган куни шахсан ўзи учиб кетиши мумкинлигини айтди. Бу ҳақда Трамп 12 май, душанба куни журналистларга маълум қилди.

«Мен учиб келиш ҳақида ўйладим. Пайшанба куни қаерда бўлишимни билмайман. Кўп учрашувларим бор, лекин аслида учиб бориш ҳақида ўйладим. Агар бирор нарса бўлиши мумкинлигини тушунсам, шундай имконият бор деб ўйлайман», — дея Трампнинг сўзларини келтиради Reuters.

Унинг сўзларига кўра, Россия ва Украина ўртасида Истанбулдаги учрашувдан «яхши натижалар кутиш мумкин» ва у «потенциалга эга». Трампнинг ўзи шу ҳафта Саудия Арабистони, БАА ва Қатарга ташриф буюради, деб эслатади агентлик.

Россия президенти Владимир Путин Европа давлатлари ва АҚШнинг 30 кунлик ўт очишни тўхтатиш тўғрисида эълон қилиш ҳақидаги чақириқларига эътибор бермай, 15 май куни Украина билан «олдиндан ҳеч қандай шартларсиз» Туркияда тўғридан тўғри музокаралар ўтказишни таклиф қилди. Зеленский Истанбулда Путин билан бевосита музокараларга тайёр эканлигини айтди. «Путинни пайшанба куни Туркияда кутаман. Шахсан ўзим. Умид қиламанки, бу сафар руслар турли баҳоналарни изламайди», — деб ёзган Зеленский. Кремль бу хабарга жавоб бермади.